Ynne ka sngi ka “Ka Sur ki Nong Jaiñtia” kawa kynthup ya ki seiñbhalang kam ka East Jaiñtia National Council (EJNC), Khasi Student Union (KSU), Jaiñtia Student Union (JSU), Federation of Khasi Jaiñtia & Garo People (FKJGP), Hynñiewtrep Youth Council (HYC), Jaintia Youth Federation (JYF) East Jaiñtia, Jaiñtia Student Movement (JSM), East Jaiñtia National Council (EJNC), Hynñiewtrep Achik National Movement (HANM) wa ka Meghalaya People United Front (MPUF) da pynman ki ya ka “Black Flag Peace Rally” wow beiñ ya i chah siat yap u General Secretary warim ka HNLC, u Cherishsterfield Thangkhiew ha ki pulit ha ka 13 tarik uni u bnai.
Ya kani ka Rally da sdang ha Khliehriat heiwa da em ka yalang wa tbian ha u Mot Sahnaam u Woh Kiang Nangbah hajan ka yung krehkaam u Deputy Commissioner ka East Jaiñtia Hills.
Hadien ka yalang na Khliehriat da ki spah tylli ki kari wa kdoh lama rong yong da hiar ki cha Jowai kam chibynta yong kani ka Rally heiwa da uiñ ki ha Iawmusiang, Jowai chwa wow pynman ya i lai kjat nadooh na Madan Daimasi (Ladthadlaboh) chadooh Laad College (KNGC).
Ha tymbud luti chirup wa ki lama rong yong, ki that wa thoh ya ki kyntien beiñ sorkar da kbai leh ya ki kyntien wow beiñ ya ka chnat pulit, ya ki montri ka sorkar jylla wa kiwi kiwi.
Heipor wa lai luti ka Rally da sakhi wa boon ki dukan ha Iawmusiang, Loomsooyung Newhill, Ladthadlaboh kamtæ ter ter da man ki kiwa da khang khyrdep chipor.
Ha Laad College da em ka yalang ya kawa da pynlai da u DS War uwa man u Chief Organising Secretary ka FKJGP-Jaiñtia Hills District.
Da yoh ya i klam na kiwa kitkaam ki seiñbhalang kiwa da beiñ yei thombor ki pulit ya u Thangkhiew uwa em hapydi i thiah kjut heiwa da wan siat yap ya oo ha i step synyaaw ka 13 tarik hapyrdi wa dang yohthiah u.
Kiwa klam da kylli ki leh yei leh ki pulit deiwa ong wa ya u Thangkhiew dang ye ki wow kem u takit ya oo tangwa ini i leh ki pulit wow siat ya oo toh iwa pyntieñ wei wa pynsyir mynsien ya kiwa boon heithaw wow yoh ki yei chaniah na ki paidbah.
Chooh chooh da em leh kiwa da ong wa lada ha sor leh ka ka sorkar kamni wow ebor wow pynkhlan pynksan ya ki pulit, da toh i por leh wa ka sorkar u booh noh ko leh ya ki bor pulit wow sonteri ya ki paidbah ha khappood ha ki thaw wa em i kajia hapyrdi ka Assam wa ka Meghalaya iwa mih awri awra dei langær.
Ya ka yalang ha kani ka sngi da pynkut da i sur rwai Ri Khasi Ri Khasi.
