Ynne ka sngi da sakhi yei ku syndet biang kiwa chah ktah ha u COVID-19 hapoh West Jaiñtia Hills heiwa ynne ka sngi da em 101 ngut kiwa dang yoh ya kani ka khlam kjut wei ha ki sngi wa dadep da em du hapoh kamwa 30 ngut kiwa dang chah ktah thymme ha uni u khñiang.
Heiyatoh wa ini hawa yaklam wa u DC ka District, u Garod LSN Dykes da ong u wa i daw wa ye u boon syndet kiwa yoh ya uni u khñiang toh wa da pynjoor ya i leh Test heiwa ha ki sngi wa dadep da leh du kamwa 200 tam ki Test ha ka chi sngi wei da pynboon noh ya ka cha ka 810 tylli ki Test ha kani ka sngi wei da yooluti leh wa heipor wa pynboon ya ki Test kiwa yoh leh daw boon ki.
Heiyatoh wa i ku syndet kiwa chah ktah wa kammon u leh ka sorkar wow yakhun ya kani ka khlam, u Garod da pyntip u wa ya katni hi daw bood yeiwa da leh ha ki tayaw wa dadep deiwa pteiñ ya ka Active Surveillance.
Da pyntip u wa na kini ki 101 ngut, em 40 ngut na Bakur wa 11 ngut ha Nongtalang kiwa haap hapoh ka Amlarem Civil Sub-Division, heiwa da leh ya ka Active Surveillance wei da leh yei jooh leh ha Demthring wa ha Moopyllaitsyiar, Khliehtyrchi.
Ha Jowai wa boon dooh kiwa yoh toh ha Hostel kiwa puræ Nursing ka Dr. Norman Tunnel Hospital, Jowai heiwa da em ki 15 ngut kiwa chah ktah.
Heiyatoh kammon wow leh ka sorkar neini chaphrang, u DC da pyntip u wa neini chaphrang daw pynboon ya ki Test hapoh ka District.
