U Montri Rangbah ka jylla, u Conrad K Sangma ynne da lai embynta u ha ka yalang pynkup burom ya kiwa yakhun kti ka jylla kiwa da jop ha ka World Arm Wrestling Championship kawa da pynman ha ri Moldova.
Ya kani ka pynkup burom da pynman da ka Meghalaya Arm Wrestling Association ha KJP Assembly Hall heiwa da emlang u Sports Minister, u Shakliar Warjri, u Pastor Bantei Mylliempdah, u President wa Secretary ka MSOA, kiwa ha-yung ha-sem kiwa jop wa kiwi de.
U Conrad hawa e yei klam da ong u wa ymthoh iwa suk wow jop ha ki yakob wa pynman cha baar ri ha kiwon kiwon ki jait yalehke wei yow ye u yoh yei jop toh du dei raikut wei kreh chitom donhi deiwa pynrap wym em poi pyrkhat wow ye ka jylla wa khian yong i wow pynmih ya ki World Champion ka pyrthai.
Da pynsñiaw u leh yei kmen wa da ye u wow yarap poisa kattu katni napoh ka Chief Minister’s Development Fund.
Da pynbna u leh wa daw em ka Inter Constituency Football Tournament kawa daw em 60 tylli ki liang kiwa daw pynmih mar kawi na kawi ka Constituency kawa daw pynman hadien ka Meghalaya Games.
Ha kani ka World Arm Wrestling Championship kiwa mihkhmat ya ka India da yoh ki 15 tylli ki takma heiwa 9 tylli ki takma toh kiwa yoh da kiwa yakhun kti ka Meghalaya.
Kiwa yoh takma ka Meghalaya man ki kamni:
Ka Senebi Syngkli da yoh Takma Tama ko ha ka yakhun kti timun wa tidiang ha ka kyrdan Women’s 55 kg Youth Category.
Ka Mihsngewbha Rymbai da yoh Takma Rupa ko ha ka yakhun kti timun wa tidiang ha ka kyrdan Women’s 80 Kg Grandmaster Category.
Ka Starina Jasaiñ da yoh Takma Rupa ko ha ka yakhun kti timun wa tidiang ha ka Women’s 60 Kg Grandmaster Category.
U Hubert Paliar da yoh Takma Tama u ha ka yakhun kti tidiang ha ka Men’s 60 Kg Para Senior HI Category.
Ka Margaret Pathaw da yoh Takma Tama ko ha ka yakhun kti tidiang katwa ha ka kti timun da yoh Takma Rupa ko ha ka Women’s 60 Kg Master Category.
U Donbor Rumnong da jop u yei naam Mr. Asia Pacific Senior Category deiwa yoh Takma Ksiar wei da yoh u leh ya ka naam Overall Men’s Physique 2024 wei da man u leh uwa nyngkong na Meghalaya wow yoh ya ka PROCARD yow lai cha Manila, Philippines.
U Johnny Nongrum won da jop u ya ka Middle Weight 6th Bidang Fighting Championship.
Discussion about this post