Ki bor pynlai District yong ka East Khasi Hills, da pyntip ki wa nadooh wa sdang i kynaad hapyrdi ki ar jaitbru ha Manipur, da em hadooh 365 ngut ki nong Manipur kiwa da poi wan yut chnong cha Shillong, tangwa napyrdi kini kattæ da em sa du 77 ngut kiwa dang em ha kani ka jylla.
Katkam i khana ka Deputy Commissioner yong ka East Khasi Hills, ka RM Kurbah, ki 365 ngut toh deiwa yoh yukheiñ wei katkam wa pyntip na kiwa yahkhmat yong ki Manipur kiwa sah ha Shillong, wei kynthup ki na ki jaitbru Gangte, Meitei wa Kuki.
Neiliang u Additional District Magistrate, u Ronnie Wahlang da khana u wa neiliang ki bor pynlai District da pynman ki yei yachem wa kiwa yahkhmat yong kitai ki le jaitbru wei da pyntip ki wa katni da em sa du 77 ngut ki bru wa dang sah ha Shillong wei kini da lai sah ki wa kiwa ha-yung wa kiwa tipmit ki wei em leh kiwa chong wai hadien wa da yoh yei pynsakhiat na ki pulit.
Da khana leh wa kitu kiwa lai liwan noh da yoh yarap ki na ka chnat pulit wei da liwan suk ki cha Aizawl wa Churachandpur ha Manipur.
Neiliang u Superintendent of Police leh da khana u wa hadien wa ki pulit da yachem ki ya ki jaitbru na Manipur, da ong ya ki wym toh u pynmih ki ya iwon iwon i kulmar hapyrdi para ki katwa dang em ha Shillong.
