Heiyatoh wa i wiar kawi ka khynnah kynthai kawa dang 14 snem kawa na ka chnong Nonghyllam, South West Khasi Hills nadooh i janmiet ka 28 tarik uni u bnai heiwa da suba kiwa hayung kani ka khynnah wa da chah rahbor ko ha u bru wa tip kam u Mohibul Ali.
Neiliang ki pulit ynne ka sngi da pyntip ki wa da chem ya kani ka khynnah kynthai na i chnong Maheshkola, South Garo Hills kawa emlang wa u Mohibul Ali uwa la 29 snem i rta uwa na Kantapara, Goalpara, Assam uwa kreh kam uwa yah kari heiwa da kem ya oo yow pynman ya ka takit wei da pynngat ya oo hapoh ka Section 363 ka IPC.
Ya kani ka khynnah da ekti biang ya ka cha kiwa hayung hasem yong ka.
Neiliang ki pulit da suba ki wa khynnah toh kawa da chah pynbiej ha uni u bru wei da lai ko wa oo dei mon yong ka hi ym toh deiwa chah rahbor ko.
Ya kini ki arngut da yarap thooh lang da ki chipai ka BSF heiwa ynne ka 31 tarik da wan ki wow pyndem ha Maheshkola heiwa ki pulit ka South West Khasi Hills da lai thooh ki ya kini ki arngut.
