Ka KSU Narpuh Circle da lai e ko dei thoh ha u Member Secretary ka Meghalaya State Pollution Control Board (MSPCB) yow pynsñiaw yei pyrchah wa joor hajrong i thmu wow khut pynman yei pynsñiaw paidbah namo ka Public Hearing neibynta i kwah ka Meghalaya Cement Ltd, Thangskai wow pynheh yei pynmih Clinker na ka 2600 TPD cha ka 4500 TPD deilang waka 10 MW CPP wa 9.5 MW WHRS yong kani ka karkhana yow chna thymme wei pynheh ya kawa da em katni.
Ya kani ka Public Hearing da booh wow pynman ha ka 24 tarik uni u bnai ha MCL, Thangskai wei ka seiñ da yoh ko leh wow pynsñiaw ha u Member Secretary yei pyrchah neidaw wa lada e laad yeini i thmu daw wanrah yei dooh nong wa khroo ya ka bei rym-aw wei da sñiawthooh leh wa daw ktah joor ko ya ka la-ær wa pynngaad neibhah pyn da katni leh da sih chwa neidaw wa em kini ki karkhana pynmih khyndaw-bilat.
Chooh chooh da ong wa i jakhlia wa mih na i pynheh chooh chooh yei bor pynmih khyndaw-billat daw pyntngit chooh chooh ko ya ki tyllong um wei boon toh ki wym ye de u pynemkaam wei suki suki daw dooh lut ya waroh ki tyllong um wei iyi wow jia ya ka pateiñ wow wan neibhah kini ki karkhana tang ya ka Sewage Treatment Plant leh ym em ki yow pynkhooid yei jakhlia wa mih na ki.
Ka seiñ da ong ko leh wa da sñiawthooh wa deiwa pynheh ya ka karkhana daw wanrah ko yei ktah wei ood i thai ki kor kani ka karkhana khamtam deiwa pynkrehkaam ki da ka Waste Heat Recovery Systems (WHRS). Wei ini daw ktah ko ya ki khonboo ki khynnah wa dang khian kiwa emkaam bha yei thiah wa khlem pynthut.
Kamtæ ka seiñ da ong ko phylla wa kammon ka MSPCB u e laad ko u pynman ya ka Public Hearing khlem da bichaar bha lada em i ktah ya ki paidbah. Kammon wow e laad ya kini ki karkhana wow yoh ki u pynheh pynyaar deiwa pynjæd pynsih ya ka rym-aw.
Hajrong kini waroh, ka seiñ da dawa ko na ka MSPCB wow pynsangeh chwa ya itai i thmu pynman ya ka Public Hearing wei wow bichaar chwa ha waroh ki liang.
Discussion about this post