Na waroh ki Constitueny ka JHADC wa KHADC u pynyakhun ka NPP, chwa ka Chritsmas u pynbna kyrtong

Ka National People’s Party (NPP) da kyntait ko warr wei ym sñiaw yahaap ko yei kam ka Voice of the People Party (VPP) wa daw khur wei daw jop tput ko ha ka Election MDC kawa daw pynman ha ki ar tylli ki Autonomous District Council, kitæ ha Khasi Hills Autonomous District Council (KHADC) wa Jaiñtia Hills Autonomous District Council (JHADC).

“Em i yaphær hawa yaklam ya ka Election MP, MLA wa MDC”, da ong u President ka NPP Meghalaya, u Prestone Tynsong uwa man leh u Symbood Montri Rangbah ka jylla.

Da ong u wa ha ka MP Election ki paidbah ki pait wei jied ki ya kitu kiwa ye wow mihkhmat neibynta yong ki cha Delhi yow kreh ha katai ka nongbah ymtoh wow chakri ha ki Constituency, u MP ym ye u leh wow lai psiah næ yooh kjat ha kawi-pa-kawi ka chnong næ ki dong.

“Katwa ha kiwi ki Election yong ka jylla kam hei jied ya u MLA næ u MDC, ki paidbah wa chong chnong jooh paitkhmat ki cha ki kyrtong kiwa suk ki wow yachem wei kiwa pait wa kit wa kynrong lang ya i khia i chon yong ki”, da ong u Prestone.

Related posts

Daw yoh ka Shillong sa kawi ka 5 Star Hotel

December 4, 2024

Da e por sa 100 sngi yow pyndep chna ya ka Assembly Building wa thymme

December 4, 2024

Ini i ong u Prestone toh hawa kylli hajrong wa mih i kam da ki kattu katni wa i rukom sñiaw ki paidbah khamtam ha ki rynsan Social Media, wa ka VPP daw khur lut ko ha ka Election MDC ha KHADC wa JHADC.

Hawa klam won wa iwa yatoh wa i pynkhreh ka NPP neibynta ka Election kawa da yooluti wow pynman ha u Thohlakhmi (Feb) 2025, u Prestone da pyntip u wa ka Party daw pynbna noh ko ya ki kyrtong ha uni u bnai chwa ka Christmas.

“I da pynkhreh i neibynta ka Election MDC kawa daw man, wei da em i thmu wow yakhun bait ha waroh 29 tylli ki Constituency ha waroh ar tylli ki District Council”, da ong u Prestone.

U Prestone da khana u leh wa neiliang ka NPP da phah ko cha waroh ki Block wa ki Unit wow e ki yei pyrtuid yong ki kyrtong. Wei ka State Election Committee ka Party hapoh ka jylla hadooh kattæ ym pu em yoh lut ko ya ki Report na kiwa boon ki Block wa Unit yong ka seiñ, wei hadien wa da yoh daw chim yei rai.

“Hadien wa yoh i yei pyrtuid yong ki kyrtong, ka State Election Committee yong ka seiñ daw bichaar bniah chwa wow pynbna paidbah”, da ong u Prestone.

Hawa kylli chooh chooh, u Prestone da ong u wa ka NPP daw yakhun Election ko samen khlem da yatoh lok chwa ka Election wa kiwi ki Party kiwa em hapoh ka sorkar MDA, deiwa khana u leh wa kiwi ki seiñ wa emlang hapoh ka MDA daw yakhun laitlooid ki katkam wa ye ki.