Ka KSU-EJHDU ha ka 27 tarik uni u bnai da yoh ko wow yachem wa ka Santa Mary Shylla, MLA ka Sutnga Saipung yow pynsñiaw ya iwa boon i eh i khoo hapoh ka East Jaiñtia Hills District ha yung krehkaam yong ka ha Byndihati.
Neiliang ka seiñ da pynsñiaw ko yeiwa emkaam hapoh ka Khliehriat Civil Hospital kawa da emkaam bha ya ka Extension Building kamjooh kiwi de kiwa emkaam yow e yei sumaar wa miat wa bha cha ki paidbah kamjooh i eh wa maad ki PHC wa CHC ha waroh kawi ka thaaiñ.
Da pynkynmoo leh yei emkaam wow em ka Higher Secondary School ka sorkar hapoh ka District deiwa pynku kyrdan ya ka Rymbai Government Secondary School katkam wa da em i tyrwa wow leh katni.
Da yaklam leh yei sah chrah ki ar tylli ki kaam wa kynthup ya ka Residential School waka Block Institute of Teachers Education kiwa em ha ka chnong Umtyra khlem da ye u pynkrehkaam kamwa da thmu.
Da dawa leh wow pynkylla ya ka Jaintia Eastern College kam ka College sorkar wa pura.
Sa kiwi ki dawa toh yow booh Rehabilitation Centre hapoh ka District neibynta kitu kiwa da chah kdoh chah khoom ha i drugs.
Da pynsñiaw leh yei sahkut i thung kreh heiwa da thung du 16 tylli na ki 40 tylli ha Ayush Hospital Rymbai wei yei emkaam leh yei yasoi soskular wa ki karkhana pynmih khyndaw-bilat yow thung kreh ki da kiwa da pyndep yei puræ na ITI.
Heiyatoh wa ki BSF, da e buit wow em noh da ka Committee wa kyrpang hapyrdi ki bor District, ki paidbah ka thaaiñ Narpuh wei kamjooh leh wa kiwa mihkhmat yow yaklam sani bha hajrong kammon wow wanrah yei yasuk hapyrdi ki BSF wa ki paidbah.
Ka seiñ ha kani ka tayaaw daw lai yachem ko sa wa u Kyrmen Shylla, MLA ka Khliehriat.
Discussion about this post