Jowai: Ka Rotary Club Jowai ynne ka sngi da pynman ko ya ka Intercity Meet-2017 kawa da wan chimbynta da ka Shillong Rotary Club waka Orchid City Rotary Club kawa na Shillong hi kawa pynman ha CTC Orchid Inn, Thadlaskeiñ.
Ha kani ka yalang da pynkup burom ya u Andrew Shullai uwa man leh u dkhot ka Rotary Club Jowai hadien wa man u kam u CEM ka JHADC.
Kiwi ki dkhot ka Rotary Club won da e ha ki ya ki phang waphær waphær wow klam ki yow yarap u sñiawthooh yeiwa emkaam ha ka imlang sahlang kamjooh hei manbru samen.
U Rtn. J.M. Pohsngap, PHF da klam u chaphang ka spah wa da e ka rymaw wa i ma wa da wanrah u bru na ki kaam wa leh u.
U Pohsngap da ong u wa ka Meghalaya em ko boon ki jait mrad wa ki jhoor ki jhep wa em du haka kam u Tymmoh Phare (Khasia Nephentes) wa u chrieh wa khlem tdong u Hulu (Hoolock Gibbon) wei waroh kini da em ki hei ma neidaw wa da jan wiar jait ki.
Da ong u leh wa u Blai da booh u ya u bru wow chare u ya ini waroh tangwa u bru hi leh u katwa ngait u.
Heijooh i por da pynkynmoo u wa nadooh ki dieñ wa ki mrad em ki jar jair ki bynta wow pynneh pynsah ya ka rymaw nadooh u ngap hadooh ki jhoor ki jhep wa e la-ær ya u bru wow riñ mynsien u kamtæ emkaam wow kynmoo wei wow burom ya ini.
Neiliang u Rt. Dr. K.S. Langbaw da khlam u chaphang i emkaam wow pynemkaam yei por deiwa ong wa kitu kiwa stat u pynemkaam ya i por ye ki u pyndep ya kiwa boon ki kaam deiwa e nongmuna u wa ki bru wa chna yung lada ymtip ki u pynemkaam yei por da chna tangdep hi-eh ki yow pyndep hei por wa biang.
U Rtn. Pradeep Pillai won da klam u chaphang ki kaam uiñke suwari deiwa ong wa ka jylla wa kha ya oo ka Kerela nyngkong ymtip ki kammon u pynku ya kani ka kaam, tangwa deiwa stat ki u chim kabu ya iwa da em chwa ha ka jylla wow kylla ya ki Restaurant cha ki Hotel wa miat katni ka Kerala da man ko kawa boon wa riñ chiboon dooh kiwa uiñke suwari wa wan hapoh ka ri.
Da ong u nachwa ka niam man ko kawa nyngkong dooh wow sdang ya ka kaam uiñke suwari heiwa kiwa ngait niam da lai ki cha ki chnong wa kyntang ki niam waphær waphær yow maad ya ki thaw wa sdang ka niam wei hadien ini won da sñiawthooh wa kani ka kaam man ko ka laad kamai wei da sdang pynpliah ya kani ka kaam heiwa nadooh wa ki ri da yaleh ki wow riñ ya kiwa uiñke suwari kamjooh leh kawi ka jylla na kawi ka jylla.
Ha kani ka sngi da yoh leh boon ki ya phyllu yumut hei yatoh wa kini ki phang wa pynchong chit ya ka yalang.
Discussion about this post