Nadooh ka 1 tarik u Naiynñiaw daw pynkrehkaam noh yei khang i pynemkaam yaki Plastic hapoh waroh kawi ka ri wei ini kynthup lang ko nadooh wow dai, u pynlang (Stock) wei wow saam muna Plastic kamjooh leh ki tiar wa da chna da ki Plastic.
Neiliang jar jiar ki District da dep ki wow pynbna chaphang ini da boon bnai chwa heiwa ha Shilong ka Meghalaya State Pollution Control Board (MSPCB), ka Shillong Municipal Board, ka KHADC waka Hima Mylliem da lai ki leh wow pynsñiawthooh ya kiwa chongdai ha Iewduh.
Da pteiñ leh wow leh yeini ha ka 10 tarik uni u bnai heiwa da chem wa kamwa 50% na kiwa chondai toh kiwa da dam wow pynemkaam ya ki Plastic wa pynemkaam du chisien donhi.
Katkam wa phah da ka sorkar heiyatoh wa ki kyndon aiñ Plastic Waste Management (Amendment) Rules, 2021, da khang wow chna, u thied, u chalan, u pynlang (Stock) kamjooh wow saam, wow dai wei wow pynemkaam ya ki muna Plastic thymme kiwa pynemkaam du chisien donhi (Single Use Plastic) wa kynthup ya ki Expanded Polystyrene nadooh ka 1 Naiynñiaw (Jul) 2022 wei kini u kynthup ki ya ki:
Ki wiah chkoor (Earbuds) wa em dieñ Plastic, ki dieñ Plastic wa em ha ki Balloon, ki lama Plastic, ki switmit wa em yuksoh Plastic, ki Ice Cream Sticks, Polystyrene (Thermocol) wa pynemkaam yow pynriam.
Da khang leh ya ki tiar Plastic kam ki khuri, ki pliang, ki klat, ki proh, siang, ki Straw, ki Tray Wrapping wa song da ki Plastic lane ki Packing Films hawa song ya ki baam wa thiang, ki Laminated Invitation Card, ki yusong sikret wa ki Plastic lane PVC Banner kiwa hapoh 100 Micron wa ki yukiñ (Stirrers).
Na waroh ki jait Plastic wa da khang, ki Plastic Straw da man iwa da ktah ya ka Amul kawa man ka karkhana wa pynmih boon da ki marbaam wa chna nei dud heiwa da paan por ko naka sorkar chwa wow khang u pynemkaam ya kini ki Plastic Straw wa da booh lang ha waroh ki jait dih wa dai ki heiwa da ong ki lada booh da u Straw wa chna da ka kot ym yahaap de wa i dor wa dai ki wei kamwa man kattæ ym em boon kini ki Straw wa chna da ka kot wa ye u thied wei da chong syad.
Ka Amul da thoh ko cha u Prime Minister Narendra Modi wow dam chwa u khang wei wow e por chi snem.
