U Nehemayah Tyngkan uwa man kam u Publicity Secretary ka JHTOA da ong u wa ka yalang da man ko kawa jop ynne ka sngi heiwa katkam wa man neiliang ka All Jaiñtia Cement Manufactures Association (AJCMA) da paan por ko chi tayaw wow pynbait ya ini i kaam neibhah wa ki Transporter wa ki karkhana da pynbaad ki iwi ya iwi hajrong kani ka bai kit (kawa T. 7 chi MT chi kilometer) wa hadooh ynne ka sngi uwi wot leh u tre truck ym em u yoh u ya ka bai kit katkam wa da rai da ka sorkar.
Da ong u wa ki karkhana da thok ki ya ki tre truck deiwa kam wa da pynkrehkaam ki ya ini i dor thymme nadooh u 19 Khonchonlad 2020 katkam ka hukum ka sorkar kamtæ da rai wa lada ym su ya i dor iwa T. 7 katwa dang em hapoh u pood ka jylla Meghalaya, u sdang noh ya i yakhih nadooh ka 1 Khonchonglad 2021 lada ini i kaam ym bait i hapoh 31 tarik uni u bnai.
Chooh chooh da pyntip u wa da rai leh wa kamwa 80% toh u kit ya ki mar kam ki Cement wa Clinker da ki tre jylla iwa mut wa mar poi ki kari ki tre jylla toh u kit wot tangwa barabor chah pyndik ki tre jylla heiwa dei yong tayaw leh da hap yang ki kari.
U Prakash Phawa uwa man kam u dkhot ka JHTOA da khana u wa ka TOPCEM ym duna ya ka 80 truck chi sngi i kit khyndawbilat wei manda pynmih ka sorkar ya ka hukum wow pynthymme ya ka bai kit, ka TOPCEM da pynkrehkaam ko ya ka chi tayaw ar tayaw tangwa nadooh u Duyatra (January) uni u snem ka TOPCEM ym em de u pynkit mar ko ha jylla (hadooh ha Byrnihat wa em ka kudam) tangwa da kit bait ki cha Assam deiwa lai lait ya kani ka hukum wei yeini da yaklam neibhah wa ini i mar toh iwa mih na Meghalaya tæ emkaam wow im ki tre jylla.
Neiliang u Nidamon Chullet uwa man kam u President ka JHTOA da kyntu u ya ki tre truck wow man ki kiwa yaichah neibhah wa da paan por ki karkhana chi tayaw wow pynbait ya ini i kaam deiwa ong wa da yang la kamwa chi snem yeini kattu won sa chi tayaw donhi wow bait ini i kaam.
Da kyntu u leh ya ka sorkar wow chimkhia yeini neibhah wa ki karkhana ym em u burom ki ya ka hukum ka sorkar hajrong ka bai kit kawa T. 7.
Hawa kylli won hajrong wa kam ki heh ka AJCMA wa ong wa kani ka hukum toh neibynta wow kit wei wow pynhiar (Loading and Unloading) u man ko du hapoh jylla Meghalaya, neiliang u Nidamon da ong u wa neiliang yong ki da paan ki wow kit du hapoh jylla donhi wei cha Assam won ye ki wow e katkam i dor Assam. Lada ym sñiaw khaisap ki tre karkhana, ki tre truck da dawa bait wa lada lai luti hapoh jylla Meghalaya toh u su ki katkam itæ hi i dor ka jylla.
Hajrong ini, neiliang u Nehamayah da ong u wa ki karkhana da e daw ki wa kammon u su ya i dor Meghalaya hawa ka chalan toh ka yong ka Assam, wei hajrong ini neiliang ka JHTOA da ban joor biang ko wow su ya ini i dor kat dang hapoh Meghalaya, neiliang ka seiñ leh daw lai bait ko wow yakhih (Strike).
