Jowai: Kam chibynta wow pynneh pynsah yei khooid i jngiar yong ka pynthor Myntdu Madan Lyngkien ka thaw wa ka-it wan ke pyngngad ki paidbah, neiliang ka dorbar chnong Ialong nadooh ka 10-12-2019 daw sdang ko wow khrong daka poisa yaki kari wa wan uinke cha Madan Lyngkein Ialong heiwa chibynta kani ka poisa wa mih na i khrong na ki kari daw yoh u pynemkaam yow pynkhooid ya kani ka thaw uiñke kawa boon ki jhep wa mih nei noh taroi kiwa wan ke yow man kani ka thaw wa khooid wa pliah.
I dor bai psiah ki kari man i kamni ha wah:
- Bus- Rs. 200
- Ki jait kari kam ki Sumo, Bolero, Scorpio wa kiwi ki jait kari wa kam kini-Rs. 100.
- Ki kari khian wa kam ki Maruti 800, Alto 800, Alto, Swift wa kiwi kiwi-Rs. 50.
- Ya ki ar chaka- Rs. 20.
Ya kani ka thaw khrong poisa da booh da ka khyrdop ha i thaw wa tip pyrtuid Shongyiar kawa em ar tylli ki surok kawi cha Kaiksoo Ialong kawi cha Madan Lyngkien Ialong.
Ya ka Gate kawa da em chwa nadooh nachwa wa khrong poisa wow psiah cha ka Ialong Park wa pynlai da ka Ialong Tourism Promotion Society u em hi ko wei hap su heini lada lai du cha ka Park tangwa ym emkaam wow su lada hiar cha pynthor wei daw hap u su manda poi haka Gate wa em ha Shongyiar .
Ini toh katkam wa pyntip da u waheh chnong, Ialong cha phi ki paidbah deiwa kyrpaad wow sñiawbha u ya krehlang.
Discussion about this post