Shillong: Ka sorkar jylla ynne ka sngi da rai ko wow pynyinsur biang ya ki kyndon khang chnong ha ka jylla deiwa dang elaad chooh chooh ya ki rukom kreh u sdang biang ki, kani ka rai kynthup ko leh neibynta ka nongbah Shillong kawa em kiwa chah ktah ha u COVID-19 wei kamjooh cha kiwi ki District kiwa haap ha ka Green Zone.
Hawa pyntip ya ini i rai ynne ka sngi, u Symbood Montri Rangbah ka jylla, u Prestone Tynsong da ong u wa ka sorkar da rai ko wa nadooh ka 11 tarik uni u bnai daw pynlait noh wow wai ya ki dukan daw tiar wow pynemkaam ha ki office namo ki Stationery wa ki dukan Automobile namo wa yatoh wa ki kari ha waroh kawi ka sor Shillong, katwa ya ka Iewduh wa ka yaw ha Khyndailad daw pteiñ ki wow khang.
Heiyatoh ya ki rukom kreh wa da chah ha kiwi ki District kiwa haap ha ka Green Zone, da ong u wa ka sorkar da rai ko wa nadooh ka Dep-Sngi-Bibar (11 tarik) u wai noh ya waroh ki jait dukan, katwa i lai i wan ki kari kamai da pynyinsur cha ka 50% naka 25%. Da ong chooh chooh u wa ha kiwi ki District daw elaad noh wow lai 50% ki kari samen (Private), lait noh ha sor Shillong.
Da ong u leh wa ya kani ka rai ka sorkar da ekti ha jar jiar ki Deputy Commissioner wa ki District Transport Officer wow pynbait katkam i chemphang wei i sñiaw wa emkaam yong ki.
Discussion about this post