Ynne ka sngi ka seiñ Jaiñtia Hills Truck Owners Association (JHTOA) da pynman ko ya ka yalang yong ki tre truck ha Ynñiawmer, West Jaiñtia Hills wow yaklam hajrong ki kaam wa sah yong ka seiñ khamtam wow pynkrehkaam ya i dor bai kit mar na ki karkhana pynmih khyndawbilat katkam wa da pynmih hukum ka sorkar.
Kam wow pynkynmoo heini ka seiñ hapoh i yahkhmat yong u President yong ka, u Nidamon Chullet ha ka 9 tarik uni u bnai da yachem ki ya ki heh yong ki karkhana ha Shillong heiwa neiliang ki heh karkhana da kular ki wow su noh katkam wa da booh da ka sorkar iwa man T. 7 chi tonne chi kilometer.
Hadien ka yalang ynne ka sngi neiliang u Nidamon hawa yaklam wa kiwa pathai khubor da ong u wa katkam ka rai wa da kular wow pynkrehkaam noh ya ka hukum ka sorkar katkam ka bai kit.
Heiyatoh wa ki kudam neiliang ki karkhana da kular ki wow booh biang ya ki ha Byrnihat heiwa u kheiñkor ki ya ki truck yong ki dkhot ka JHTOA wei ki tre truck na Ri-loom Jaiñtia ymtoh wow yang ki kamwa yang kiwi.
Heijooh i por da ong u wa ya ini i dor u pynkrehkaam noh nadooh ka 15 tarik wei lada ki karkhana kyntait ki, ye ki tre truck wow phone cha u President ha u Number- 7005082167.
