Jowai: Ynne ka sngi da pynman ya ka yalang yong ka Joint Action Committee (JAC) yong ki tre kari (truck) wa kit mar ya ki karkhana khyndaw-bilat wa kynthup ya ka All Jaiñtia Cement And Clinker Transporters Association (AJCCTA) wa ka Jaiñtia Hills Truck Owners Association (JHTOA) heiwa da yoh kyrchaan leh sa na kawi ka seiñ, ka Meghalaya Truckers Union (MTU).
Ka yalang wa da pynman ha Phramer ynne da chong pyrkhat kammon wow leh heiyatoh wa ka hukum (Notification) ka sorkar jylla lyngba ka chnat Transport Department wa da pynthymme yei bai kit mar na ki karkhana khyndaw-bilat wa da pynmih ha ka 13 tarik Duyatra (January) 2020.
Kani ka hukum wa da pynmih da ka sorkar jylla lyngba ka chnat Transport Department toh kawa da pynthymme ya i dor wow kit mar ki kari heh (truck).
I dor bai kit mar katkam wa da pynmih ka sorkar toh man ka chi ton ha man ka chi kilometer u man i T. 9 ha u sarok psiang, T. 11 ha u sarok moo wa T. 12 ha u sarok khyndaw.
Hadien ya ka yalang, hawa yaklam wa u JG Kyndiah uwa man u Adviser ka JAC da ong u wa ynne da chim ya ka rai wa nadooh ka 15 tarik uni u bnai u sangeh noh ki wow kit ya ki mar cha ki karkhana khyndaw-bilat kat hadooh wa ympu pynkrehkaam ki ya i dor wa da booh da ka sorkar.
Neiliang u Nidamon Chullet uwa man leh u President ka JHOTA da ong u wa katkam ka rai wa da chim chwa toh nadooh ka 11 tarik u pynkrehkaam ya kani ka dor wa thymme tangwa ki karkhana khyndaw-bilat da paan por ki tangwa ynne da chim ya ka rai wow pynkrehkaam noh ya ini i dor thymme nadooh ka 15 tarik.
Chooh chooh da kyntu u ya ki tre truck waroh wow kreh ki chirup wei lada ym mano ki karkhana wow sangeh noh u kit ya ki mar yong ki, deiwa pynrap leh wa ki karkhana toh u ngait u bood ki ya ka hukum wa da e ka sorkar lym kamtæ pynyoo i wa ym kheiñkor de ki ya ki hukum yong ka.
