Ka Nangkiew Irat daw yachem ko waka Mawlai haka yalehke wow sdang ya ka Officer’s Choice Blue Shillong Premier League 2021-22 ha ka 15 tarik uni u bnai.
Hadien ar snem wym em pynman ya ka SPL neidaw wa em ka khlam COVID-19, ka lympung yalehbol wa heh dooh ka Meghalaya daw pynman biang ya ka ha madan Polo ha ka Third Ground heiwa waroh ki yalehke u sdang ki heipor 4:00 waje noh chariñ ka sngi.
Ka Shillong Sports Association da pynbna ko leh yei ya krehlang wa boon snem waka Officer’s Choice Blue wow man kam ka Title Sponsors ka SPL wei kani ka Tournament daw e ko T. 3 lak kam ka song poisa cha kiwa man Champion iwa da ku da 50%.
Ka Shillong Lajong kawa da jop la soo sien wei kamwa man leh kam ka Defending Champion, ka 2019 Runners-up ka Rangdajied United, kawa da jop la arsien ka Langsning, Ryntih waka Nangkiew Irat waroh daw chibynta ki heiwa ka Malki leh dapoi biang ko cha kani ka kyrdan he sien nyngkong nadooh u 2018.
Daw em leh ka Mawkhar waka Mawlai. Ka Mawkhar da jop ko ya ka First Division ha u 2019 heiwa ka Mawlai da yoh wa ar ko. Ka Mawlai da psiah biang ko chapoh ka SPL hei sien wa nyngkong nadooh u 2013.
Ki yalehke toh da ka League kamwa da leh nadooh u 2019 wei ym em ki Playoffs lane ka Final. Hadien ka First Leg wa Second Leg iwa mut 14 tylli ki yalehke mar kawi ka Team wei waroh dapoi 56 tylli ki yalehke, kiwa boon Point dooh daw man ki kam ki Champion.
