Kiwa sikai skur Samagra Shiksha Abhiyan (SSA) hapoh ka lama yong ka All Meghalaya SSA School Teacher’s Association (AMSSASTA) da pynbna ki wow sdang da ka yakhih wa khlem booh por nadooh ka 15 tarik uni u bnai neibhah wym pu yoh ya ka tulop kattu la 5 bnai.
U Defender S Lamare uwa man u Secretary ka AMSSASTA da khana u wa kiwa sikai SSA da dep ki wow pynsñiaw ya ini deiwa booh kyrpaad hakhmat u Montri Rangbah ka jylla, u Conrad K Sangma ha ka 5 tarik uni u bnai, heiwa ynne ka sngi da lai booh biang ya ka chithi wow pynkynmoo yei dawa wei i eh i khoo kiwa sikai SSA.
Heijooh i por da ong wa ka AMSSASTA da khut da wer ko leh ya ki dkhot ka Meghalaya SSA School Association wei kamjooh ya ka All Garo SSA School Association wow embynta ha katai ka yakhih dawa tulop.
Katkam i ong u Lamare, i daw yong i pynslem ka sorkar pyrdi wow pynlait poisa neibynta kiwa sikai SSA ha Meghalaya ye u man i wym ye u pynbiang ha i por ya ki Utilisation Certificate. Chooh chooh da ong u wa kiwi ki jylla ym em i chah kset ka tulop kiwa sikai SSA neibhah i bhah man ko man 50% na ka sorkar pyrdi wa ka sorkar jylla, wei lada ka sorkar pyrdi ym pu pynlait ko yei bhah, ka sorkar ha kiwi ki jylla su hi ki cha kiwa sikai.
Da ong u leh wa du ha Meghalaya wa ya ka bhah wow su cha kiwa sikai da man ko 90% na ka sorkar pyrdi katwa 10% na ka sorkar jylla.
