Shillong: Ka sorkar jylla ynne ka sngi da rai ko wow wai noh yaka Ïewduh nadooh ka 22 tarik uni u bnai deiwa wai hapyrdi 30-33% ki dukan chisien wai.
U Symbood Montri Rangbah ka jylla, u Prestone Tynsong ynne ka sngi da ong u wa hadien wa ka sorkar da lai sylli ko yaka Ïewduh ha i por step wei hadien wa da yoh ya i e yumut waki kot ki sla na ka Deputy Commissioner, KHADC wa Hima Mylliem. Da pyntip u wa katkam wa yoh yukheiñ naka DC, da em 1222 tylli ki dukan wa da tipmit wow chah u wai, khlem da kynthup yaki dukan dai doh, dakha, dukan kwai wa pathi, jhoor wa dukan kot kiwa ym pu chah u wai neibhah wa ya kini ki jait mar da yoh thaw dai ki cha wi.
Da ong u leh wa i wai ya kini ki dukan u man ko leh deiwa bood ryntih yaki kyndon wa da booh da ka chnat i chait i khiah ka jylla.
Da pyntip u leh wa i rukom wai yaki dukan toh chi sngi da kiwi wa chi sngi da kiwi wei ya ini daw pynbna daka DC wei yaki Standard Operation Procedures (SOP) daw phah cha ka Hima Mylliem kawa pait ya kani ka yaw.
Chooh chooh da ong u wa katwa dang yoh yaki Report naka DC daw wai chooh chooh yaki dukan.
Heiyatoh wa kiwa chong dai madan da pyntip u wa ym chah yaki kiwa em kamwa 1000 ngut wei daw thooh thaw yaki da iwi yow dai ki yaki mar yong ki.
