Jowai: Kam chibynta wow pyndooh jait ya i kjut Ñiangpyrchit ha u snem 2020 katkam ka thong ka sorkar India, ka East Jaiñtia Hills District u sdang noh ko ya ka Measles Rubella Vaccination Campaign wow e dawai wow yada na u Ñiangpyrchit ka wow sdang nadooh ka 24 tarik uni u bnai neibynta ki khynnah nadooh 9 bnai hadooh 15 snem i rta, heiwa daw sdang nyngkong ha ki skur neibhah kamwa 75% kiwa dang toh hok wow yada toh kiwa dang em ha ki skur, neitæ won u lai cha ki dong ki chnong nalor ki Hospital leh u e dawai yada ki man ka Sngi lait noh ka sngi Walang (Wednesday).
Ha i pynche hajrong kani ka e dawai, u Deputy Commisioner ka East Jaiñtia Hills District u F.M.Dopth hei emlang leh ki Doctor ka District, da pyntip u wa da dep pynman ya ki yalang pynsñiawthooh paidbah hajrong ini waroh ha ki skur wei da chna leh ya ka District Tast Force kawa daw yahkhmat pyn da oo hi.
Da pyntip u leh wa ha ki 8 tylli ki thaw sumaar wa kynthup ya ki CHC wa PHC ki Doctor da chimkhia ki neibynta wow pynkrehkaam wow pynsñiawthooh paidbah wei da embynta leh ki sahep ka yungkrehkaam u BDO ki wa leh ya ini lyngba ki waheh chnong wa ki Secretary chnong hajrong wa emkaam wow yoh ya i yada na ini i kjut.
Da mang wow pynkrehkaam ya kani ka e dawai ha ki 206 tylli ki chnong, ki skur 598 tylli wa 231 tylli ki Anganwadi Centre.
Katkam wa pynche ki Doctor da ong ki wa u Ñiangpyrchit toh u khniang kjut uwa yabi wa uwa man uwa jooh mih ha ki khynnah wei ktah u leh ya kiwa da heh wei ya ini i jooh i rukom e dawai da pynkrehkaam nadooh u snem 1985.
I kjut Ñiangpyrchit ha ka ri Germany da tip kam ka Rubella wei ya sariem bha ko wa u Ñiangpyrchit haka ri yong i wa tip kam ka Measles hanlada man ki kiwa ya sariem.
Ha ka ri Germany lada ka manbei kawa punkhon chah ktah ko ha i kjut Rubella i khon leh ye i u chah ktah iwa daw ktah leh yei bor ki khmat, i bor sñiaw ki chkoor, i bor jabieñ, u klong snaam wa kiwi kiwi.
Neliang u DC deilang da khut u ya ka yakrehlang na waroh ki tnat krehkaam kamjooh neibynta i bha i miat ki khynnah haka imlang sahlang wei ymtoh leh u em ki khynnah wym hoi u dooh dawai.
Chooh chooh da pyntip wa daw em leh ka Rally ha District Headquater Khliehriat haka 14 tarik uni u bnai wa ha Saipung won haka 11 tarik.
Discussion about this post