Nadooh ka 05-07-21, u DC ka West Jaiñtia Hills da pyntip u wa waroh ki dukan, ki yung krehkaam sorkar wa ki yong ki bru samen, ki kari kamai hapoh ka District hap ki wow pynyoo wa lada man ki kiwa da dep wow yoh tika namo ym pu em deiwa booh ya ki dak “VACCINATED” lane “NOT VACCINATED”.
Kam wow pynkynmoo wa u DC da pynmih hukum u hajrong ini ha ka 25-06-21 kam chibynta wow bood ya ka hukum ka High Court ka Meghalaya yow phah ya waroh kiwa chondai dukan, ki thaw kreh wa ki kari kamai wow pynyoo deiwa booh da ki dak lada toh kiwa da yoh tika namo ki wym pu em khlem pep yow tip ki bru paidbah wow jied kam i hok yong ki wow yada ya idæ.
Ka hukum wa pynmih u DC da phah ko ya waroh ki dukan, ki yung krehkaam (sorkar/bru samen) wow booh ki ya i dak “VACCINATED” ha i thaw wa chynna bha hakhmat ki dukan lane ki yung krehkaam lada waroh ki bru wakreh, kiwa chong dukan toh kiwa da yoh tika. Ha kitu won ki dukan wa ki yung krehkaam ki wym em chim yei tika, hap ki wow booh ya i ktien “NOT VACCINATED”. Kitu wym leh ya ini daw chah khang i dukan lane i yung krehkaam yong ki.
Ki kari kamai wa kyntup ya ki Local Taxi, Auto Rickshaw, Maxi Cab, ki Bus leh toh u booh ki ya ki dak “VACCCINATED” ha i thaw wa chynna bha ha ka yit kari lada kiwa yah kari, ki Conductor wa kiwa yarap ya ki da yoh ki yei tika. Katwa kitu ki wym em chim yei tika toh u biah ki ha ka yit kari “NOT VACCCINATED”. Ya ki wym leh ya ini, da e bor ya ki pulit wa ki bor District wow phah sangeh yei kamai kari.
Ya kitu won kiwa chongdai yaw kiwa da e thaw ya ki da ki Market Committee/Dorbar Chnong/Jowai Municipal Board yow dai jhoor, soh wa kiwi kiwi katkam wa chah, hap ki wow em ya ka Certificate wa e da u Waheh Chnong wa em yei pyrtuid, thaw sah, Mobile Number kawa daw ong leh lada toh kiwa da dep yoh tika namo ki wym pu em yoh tika iwa mut Vaccinated lane Not Vaccinated.
Ya kitu ki wym bien u chim tika kiwa yang dukan, kiwa chongdai cha yaw wa ki wakreh ha ki yung krehkaam, hap ki wow phah leh Test RT-PCR khlem pep man ka 10 yow chngaaiñ wei wow yada ya ka imlang sahlang.
Waroh kitu kiwa chem kiwa man kam ki High Risk Contact da ki Sector Magistrate/BDO/Medical Officer/Police Officer hap ki wow phah Test da ka RT-PCR yow kdoh u khoom yei poor ka khlam. Ki CCMT wa ki Contact Tracing Team toh u man ki kiwa paitbniah ya kitu ki thaw pynman khayi pateiñ wa em ki bru ki wym pu em chim tika kamjooh ki wym em phah Test yow ye wow leh yei booddien.
Lada em kiwa pyrchang wow pynpoor ya ka ki khubor hamsaya da uwon uwon u bru næ ki seiñ deiwa yahbkla yei rukom krehkaam i tika, daw chah pynchitom ki katkam ka aiñ.
I wai ki dukan wa i rukom lai ki kari kamai u man i katkam ka hukum wa da pynmih neipor cheipor da ka yung krehkaam u DC.
