Neidaw wa ki kharkhana pynmih khyndaw-bilat wa em hapoh Ri-loom Jaiñtia wym em pynkrehkaam ki yei dor bai kit ki Truck ki tre jylla katkam wa da pynbna ka sorkar, wot hadien wa da ya bait hei yaklam neipor cheipor, kamtæ ynne ka sngi ka seiñ Jaiñtia Hills Truck Owners Association (JHTOA) haka yalang General Meeting wada pynman ha Tuber Takhñiang, East Jaiñtia Hills District, da chim ko yaka rai wow pynman i yakhih wa rap khor iwa khlem da booh por namo ka Indefinite Strike nadooh i step yong ka 6 tarik uni u bnai.
Ha ka yakhih, ka JHTOA da maham ko wow leh deiwa khor itæ wow khang ya waroh ki Truck wa kit Cement, Clinker wa kiwi won ki mar wa toh u lai cha ki kharkhana, najrong wow dawa wot ka JHADC leh wym toh u e Trading License ko ya ki kari wa kamai ki karkhana pynmih khyndaw-bilat hapoh ka Ri-loom Jaiñtia.
U Nidamon Chulet, President JHTOA da khana u wa katkam wa da pynbait, i dor toh T. 7 chi Kilometer wei ki kudam ha Byrnihat toh u neh ki hapoh ka jylla, wot i su i tda leh u man kam nachwa hi, najrong wow e wow kit mar chwa leh ya ki Truck ki tre jylla, tangwa iwa leh won ki ym yahaap kamwa yaklam.
“Kam ki tre Truck haka jylla i yoh wow kit toh du chisien arsien chi tayaw wei ini toh neidaw wa ki kharkhana da thied ki yong ki hi ki Truck, heiwa kam ka Star Cement da thied ko palat 200 tylli ki kari,” da ong u Nidamon.
Chooh chooh ong u wa dang em boon ki laad wow yakhih ki neibhah katni da yoo yei chah ktah u paidbah chawa palat pood haki kharkhana pynmih khyndaw-bilat, heiwa nachwa da pdiang dei angnood u yoh kamai u imlang uwa boon, tangwa katni da man dei khangtleiñ heiwa da knieh lut ki waroh wot i ja-kpoh yong ki tre ri kamjooh.
Kamtæ neiliang u President ka JHTOA, da kyntu u yaka sorkar wow chimkhia yeini deiwa bichaar bniah katkam ka hukum wada pynmih ko, neibhah i leh yong ki kharkhana wym du wa thok chukor ki yaka JHTOA tangwa wot yaka sorkar jylla kamjooh.
Heijooh i por da kyrpaad u yaka seiñ Meghalaya Truck Owners and Suppliers Association wym toh u chim ki ya ki kaam yakhih (Issues) yong ka JHTOA, najrong kiwa man dkhot yong ka ym ye ki u man dkhot haka JHTOA.
