Jowai: Chibynta wow pynkhreh ya ka Measles- Rubella Vaccination Campaign (MRVC) namo ka e dawai wow yada na u Ñiangpyrchit ha West Jaiñtia Hills District, ka yung krehkaam Medical & Health Officer da pynman ko chiboon ki yalang pynsñiawthooh paidbah wa ka esikai ya ki Medical Officers, ki ANM, ki ASHAs wa ki Anganwadi Worker hajrong kani ka phang.
Ka District Task Force Meeting heiwa u Deputy Commissioner da man u kam u chongknor da pynman ya ka heiwa da emlang ki tnat sorkar, ki skur, heh niam, waheh chnong wa kiwi kiwi.
Neiliang u Deputy Commissioner da pynksan u yei emkaam wei man kongsan kani ka kaam heiwa da kyntu u ya waroh wow chimkhia ki ya ka.
Da pynman leh ya ka Block Task Force Meeting ha waroh ki le tylli ki Block ka District.
Da pynman leh ya ki yalang hapyrdi kiwa sikai wa ki manbei manpa ha ki skur sorkar wa ki skur samen heiwa da ye u pynman ya kam kini ki yalang ha ki 80 percent tylli ki skur hajrong kani ka phang.
Kani ka e dawai neibynta ki khynnah wa dang 9 bnai hadooh 15 snem daw sdang ko nadooh ka tayaw wa khaddooh yong uni u bnai.
Discussion about this post