Ka District Health Society, West Jaiñtia Hills, Jowai ynne da lehkmen ko ya ka World Tuberculosis Day hapoh ka District ha Khimmusniang Indoor Sports Hall, Jowai hajrong ka phang, “Yes! We can End TB” heiwa ka HML Kynta, Additional Deputy Commissioner, West Jaiñtia Hills da wan ko wow embynta kam ka kongsan.
Ka kongsan hawa e yei klam da ong ko wa kani ka sngi toh yow pynkynmoo ya i uwi pa uwi wa ini i kjut toh iwa chim yei mynsien bru kamtæ da kyntu ko ya waroh wow em i kitkhlieh yow pynkut noh yei poor ini i kjut.
Da ong ko leh wa kiwa chitom na kani ka kjut em ki ya ka bynta wa emkaam yow yaleh pyrchah ya ini i kjut deiwa dih tista ya ki dawai katkam wa da phah ya ki wei wow lai phah Test ki dei langær kamwa phah da ki Doctor.
Hawa pynsñiaw yei siawkhia hajrong ka Tuberculosis kawa poor ha ka la’ær (Air-borne disease), da kyntu ko ya ki paidbah wow kreh chirup wow pynman ya ka talawiar soodong kawa khooid wei lada chem ya ki bru kiwa em ki dak wa yoh TB, toh u pynchlur ya ki wow lai ki wut-wut cha ki Doctor.
Ka Dr. I. Khyriem, Senior Medical & Health Officer, DTC, Jowai da pyntip ko wa ka World TB Day da lehwarom ya ka ha ka 24 tarik u Wisu wow pynsñiawthooh paidbah hajrong kani ka kjut deiwa klam pynche ya ka phang yong kani ka sngi “Yes! We can End TB”, da khut ko leh yei ya krehlang wow pynkut noh ya ka kjut.
Ka Dr. EBV Laloo, District Tuberculosis Officer, West Jaiñtia Hills da batai ko ya ki dak ki chin lada yoh ya ka TB wei da pynkynmoo wa waroh ki bru emkaam u syndong ki wow yada pyn ya ki hi na kani ka kjut.
Ha kani ka yalang da yoh leh i klam na ki TB Champions kiwa kynthup ya ka Newlyborn Sungoh wa ka Preni Phawa kiwa da jop yei kjut TB..
Wow pynsñiawthooh hajrong kani ka kjut, ka District Health Society (NTEP), West Jaiñtia Hills ha i step da pynman ko ya i lai paidbah ya iwa da sdang na Madan Daimasi, Ladthadlaboh, Jowai heiwa ki khynnah na ki skur waphær waphær na Jowai da rah ki ya ki kot rben wa thoh ya ki kyntien chaphang kani ka kjut wei da pynkut yei lai kjat ha Khimusniang.
Kam wow pynkynmoo ka District Health Society da pynman ko leh ya ka Street Play ha Iawmusiang, Ladthadlaboh ha ka 17 tarik uni u bnai kamjooh leh i yalehke Sports ha Panaliar Secondary School, Jowai.
Da saam leh ya ki Prize cha kiwa jop ha ki yakob wa kamjooh leh ki Certificate of Appreciation cha ki ASHA wa kiwa kreh ka Medical & Health Office.
