Ka Dorbar Chnong Ialong da kynmoo buromlang ko ya ka lyngkhooh snem wa 79 i yoh laitlooid ka ri India namo ka 79th Independence Day deiwa phooh wa phieñ ha madan ka yung krehkaam ka chnong ha Moomulang Centre Point.
Da chimbynta ha kani ka sngi wa emburom da ki dkhot Committee yong ka chnong, ki skur wa em hapoh ka chnong nadooh ka Jowai District Presbyterian Secondary School, ka Modern Secondary School Ialong, ka Ialong Secondary School wa kiwi ki Govt. L.P. School kiwa da wan dei mynsien chongchit chirup kiwa chong chnong.
Ya ka lama le rong ka ri da wan wow pynhær da u President ka Meghalaya People United Front (MPUF), u Dapoi Wanmi Laloo, uwa da chim leh ya ka Rastriya Salute neibynta kiwa boon tylli ki dhab wa chimbynta ha ka lehkmen.
Ha kani ka yalang da saam leh ya ki khusnaam kaam ka Extraordinary Award cha u Lineman, u Wankloi Phawa uwa na ka chnong Mihmyntdu uwa pait yei chngaaiñ wei miat ka rukom poi bordiñ ha ka chnong Ialong.
Da e khusnaam leh cha kiwa yelehke kiwa da jop ha ka Meghalaya Games yong u snem 2025 kawa da pynman ha West Jaintia Hills District wei kini kynthup ki ya u Shanlangki Lyngdoh wa u Da O Hi Dhar na ka chnong Ialong kiwa man kiwa jop ha ka yakob Rah Mookhrah (Relay Race).
Da saam leh ya ki khusnaam Excellence Award cha ki khynnah skur kiwa yoh 100 na 100 ki Marks ha ki kattu katni tylli ki Subject ha ka Exam Matric wa pynman da ka MBOSE kamjooh da ka CBSE ha uni u snem 2025.
Da saam leh ya ki khusnaam cha ki khynnah skur kiwa yoh 70%+ ha ka Exam Matric 2025 wa pynman da ka MBOSE wa ka CBSE, pynkut ka kyrwoh na u waheh chnong ka Dorbar Chnong Ialong, T. Ram Phawa.
Discussion about this post