Ka seiñ HANM Narpuh Circle haka kyrwoh na u Publicity Secretary ka seiñ u S. Pala da ong u wa ka seiñ da pynsñiaw ko yei sñiawkhia wa joor wa i chrai wa ka chnat MeECL ym ye ko u pynyoh bordiñ wa biang hapoh ka thaaiñ waroh kawi heiwa mar ya hiar slap te pyndooh wot ya ka bordiñ kawa da man kamwa chim kabu hawa ki kharkhana pynmih khyndaw-bilat da yoh bordiñ ki waroh 24 kynta. Katwa ka thaaiñ Elaka Narpuh ym em yoh bordiñ ko nadooh wa hiar u slap.
Ka seiñ ini wadep da dawa ko wow pynboon ya ki wakreh Lineman khnang wow suk u pynchna ya iwa sih tangwa da leh khlot ka MeECL yeini neibhah i dooh bordiñ ha ka thaaiñ Narpuh ym toh de iwa ke heiwa da dooh da ki tayaw ki bnai katwa ka bai bordiñ da hap wow su bait hanla ki paidbah hap ki wow chong hei doom.
Kamtæ ka seiñ da kylli ko wa kammon ka sorkar pynbiang bordiñ ko du ya ki karkhana pynmih kyndaw-bilat katwa ya ki paidbah won ym ye wow pynbiang?
Hei yongsakhiat ya ki tiar kiwa da sih da toh wow pait lane kylliang noh smat yow lait u thut i pynpoi bordiñ, kamtæ ka seiñ da kyntu joor ko ya ki bor wa toh u pait wow sñiawbha ki u chimkhia ya ini i bynta yow suk ki paidbah.
