Ha u snem 2019, ka sorkar Meghalaya da pynkrehkaam ko yei buit wa thymme wow booddien yei chait i khiah wa i rukom sumaar ya ki manbei wa punkhon khnang wow pyntikna wa suk ki u kha khon ha kylleiñ ki bynta yong ka jylla. Wei yow ye u poi cha kani ka thong da pynemkaam da ka MOTHER App, kawa ye wow booddien wei wow pynlang yutip chaphang ki manbei wa punkhon wei wow pyntikna leh wa ki manbei lai kha khon ki ha ki thaw sumaar wei ini da yarap hadooh kattæ kattæ wow pynduna yei em ki manbei kiwa yap heipor wa kha khon iwa tip kam ka Maternal Mortality Rate (MMR).
I ye yong kani ka App wow krehkaam toh deiwa e yutip deiwa biang wa deiwa tikna na kiwa kreh ka chnat i chait i khiah lyngba ki ANM cha ki Doctor wa cha ki heh i chait i khiah ha ki District wei leh heipor wa booddien ya kitu ki manbei wa punkhon heiwa kani ka App da kdaw lut ko ya waroh iwa emkaam u tip.
“Nachwa i booddien yei chait i khiah yong ki manbei wa punkhon toh iwa eh bha neibhah wym tip deiwa biang kammon man ki, wei chitom wow lai pait ha kawi pa kawi ka Register,”ong u Ramkumar S, IAS, Additional Secretary ka chnat i chait i khiah ka sorkar jylla.
Hawa sdang nyngkong ya kani, da pynkrehkaam chwa ha South West Garo Hills wei lyngba katai ka App da chem wa da kyntu naka 44% cha ka 76% ki manbei kiwa punkhon kiwa da lai kha khon ha ki thaw sumaar wei ini toh du hapoh 6 bnai. Kamtæ deiwa mih soh ini i krehkaam, da pynkrehkaam ha waroh kawi ka jylla.
Deiwa pynemkaam ya ka Mother App ha ki Phone yong ki manbei, ki ANM da ye ki wow pynlang lut yei yutip chaphang ki manbei wa punkon nadooh i rta ki, lada em i maa hawa kha khon, ka tarik wa ye u kha khon, i lai e tika wei leh mynnu u lai ki wow leh Checkup neitæ i thaw sah wa kiwi kiwi ki yutip. Ya kitai ki yutip da booh leh ha ka Dashboard yong katai ka App khnang wa ki Doctor wa kiwi ki wareh ye ki wow booddien khamtam ya kitu ki manbei kiwa em hei maa wa kiwa da toh por wow kha noh.
U Dr. Tyngshain Sutnga, Medical Officer yong ka Bhoirymbong CHC, da pyntip u wa ka MOTHER App ini wadep da ye ko wow pynlait im ya kawi ka manbei kawa em hei maa kawa da kyntait wow lai kha ha i thaw sumaar ya i khon. Ya ini i jia da tip chwa toh kawa em hei maa namo ka High-Risk Pregnancy wei yeini da booddien da ki ANM kiwa da lai pynsñiawthooh ya ka manbei wa emkaam wow lai kha khon ko ha ka thaw sumaar wei da phah leh ya ka ASHA wow lai yachem ya ka.
Katai ka manbei da kha khon ko chi sngi hadien i por wa da booh wei i tngit da sahkut i chapoh. Kamtæ kiwa ha-yung ha-sem khlem pynslem da pyntip ki cha ka ASHA kawa lai peit wut-wut wei da pyntip leh cha ka CHC wei da phah ya ka Ambulance wow lai choo nei thaw sah yow pynkit cha Hospital heipor wa biang wei kamtæ da lait im. “Kani toh ka nongmuna wa kammon kani ka App da ye ko wow yada wei wow pynlait im ya kani ka manbei”, ong u Dr. Sutnga.
Ki yutip kiwa da um lyngba ka MOTHER App, toh kawa ye leh ki paidbah u pait ha ka Dashboard lyngba ka website www.meghealth.in. Kani ka yutip yarap ko leh wow booddien wot yei chait i khiah yong ki manbei wa punkhon wei toh i dawbah wa ka jylla katni da duna ki manbei wa yap heipor wa kha khon.
