U Symbood Montri Rangbah ka jylla Meghalaya, u Sniawbhalang Dhar, ha ka 19 tarik uni u bani da lai hiar u cha chnong Moopliang kawa haap hapoh ka West Jaiñtia Hills District yow yachem wa kiwa yahkhmat ka Balang Presbytarian Moopliang yow e mynsien wei sñiawlem heiyatoh wa i iñ ka yungmane yong ka Balang Presbyterian Moopliang ha ka 22 tarik u Naisan.
Ha kani ka sngi da chong pyrkhat leh kammon u chna biang ya kani ka yungmane yow ye biang u ngooh u dem kamwa jooh.
Neiliang u Sniawbhalang da paan maap u yei wym ye u wow wan smat neidaw wa hap lai emkaam u cha baar ri ha kitu ki sngi wei da pynsñiaw u leh yei sñiawsih yeini wa jia wei sñiathooh u leh hadooh katwon kjut mynsien hawa jia kam ini. Wei da ong u wym toh u dooh kyrmen tangwa u chaniah wei wow e kti ha u Blai kynrad neibhah oo wa tip iyi wa bha tam neibynta yong ki.
Da pynkynmoo u leh yei parom u Job uwa man uwi na ki chakri yong u Blai uwa da maad yei tynjooh wa boon tangwa pteiñ u wow e ngooh ya u Blai wot hei kmen kamjooh hei chem jinjar. Kamtæ da kyrpaad u ya ki khon ka Balang wow man kiwa ya maya wa kiw sbun wei kiwa yatyli yow ye u pynchna pynyieñ biang ya kani ka yungmane.
U Symbood Montri Rangbah da khana u wa dadep u wow kular wow e yarap Rs. 25 lak yow chna thymme ya kani ka yungmane hadien wa wan ood wan naam kiwa yahkhmat ka Balang ha kini ki bnai wa dadep wei da kular u leh wow nang thooh chooh chooh ki laad ki luti yarap yow pyndep smat i chna ya kani ka yungmane.
Discussion about this post