Ka chnat Home (Political) ka sorkar Meghalaya da pyntip ko wa neidaw wa em u jait khñiang COVID-19 uwa smat wow yabi wei uwa ktah ya kiwa dang khynroo wa kiwa da heh kamjooh, neidaw leh wa boon kiwa chah ktah da emkaam Oxygen ki iwa da pynchitom ya ka chnat i chait i khiah wow ye ko u e yei chakri kamjooh leh wa dang duna kiwa wan chim yei dawai tika yow yada na ka khlam, kamtæ yow yada ya ki thaw wa man sor kiwa ku bha kiwa yoh ya uni u khñiang, da pynmih ya ki kyndon wow kdoh u khoom yei poor ka khlam nadooh ka 01-05-21 (5 AM) hadooh 10-05-21 (5 AM).
Neibynta waroh kawi ka jylla
Ha waroh kawi ka jylla ym chah wow pynman ya kiwon kiwon ki yalang paidbah. Ki bia wa ki kaam wa yatoh wa i yap bru u chah hi deiwa em du 30 ngut ki bru wei deiwa yoh bor chwa na ki Deputy Commissioner.
Da khang ya waroh kiwa uiñke suwari kiwa wan na baar ka jylla wei da khang leh ya waroh ki thaw uiñke suwari. Da khang leh ya waroh ki khayi khappood wa kiwi ki ri deilang wa ki yalehke Sports.
Ki DC da e bor wow pynlai ki yei rukom wai ki yaw wa chisien chitayaw kamjooh ki yaw wa em ha khappood ki District ki.
Da e bor ya ki DC wow phah khang ki ya ki skur wa em hapoh ka District iwa chong hei long i man.
Heiyatoh won wa ka Shillong, Tura wa Jowai da chah ya kini ki kaam ha wah:
Ki dukan wa dai ya ki mar wa emkaam u wai ki katkam wa pynbait ki DC wei ki jait dukan man ki katkam ka hukum No.POL/2020/Ptl/13 kawa pynmih ha ka 12-04-2020.
Ki dukan wa yatoh wa ki Hardware, Electrical, Plumbing & Sanitary Ware, kiwa chna Computer, chna kari u wai ki katkam wa pynbna ki DC.
Ym em khang ya ki kaam wow chna wow tei kam ki chna yung wa kiwi kiwi.
Ym em khang ya ki Bank, ki Post Office wa ki Telecommunication Services.
Ym em khang yei wai ki yung krehkaam wa emkaam ka sorkar jylla.
Ki thaw kreh ka sorkar pyrdi wa ki Bank u krehkaam ki 100% ki wakreh neibynta ki Group A katwa 30% ki Group B, C wa D.
Ym em khang yei lai i wan kiwa ye u pynsakhiat kiwa yatoh waka sumaar sukhær, i lai chim dawai tika, ka rep ka riang hadooh ki kaam wa yatoh wa ki mrad wa ri wa psan, i kit ya ki mar wa emkaam, i lai i wan kiwa yaleh Exam, kiwa sikai wa kiwi kiwa embynta hei pynman Exam.
Ym em khang leh ya ki kari wa kit mar, ki E-Commerce, kiwa kit ya ki dawai dachin, kiwa leh Home Delivery, ki laad pathai khubor wa ki bru wakreh hei chna yung wa kiwi ki jait kam kam kini ki jait.
Ym em khang yei lai i wan ki bru wa leh ya ki kaam wym hoi u dam nadooh ki wakreh heiyatoh wa u COVID-19, ki pulit, ki chipai, ki Home Guard, ki pulit tympleh diñ, ki wakreh hei pynpoi bordiñ (NEEPCO, MeECL, Powergrid wa kiwi kiwi), ki wakreh PHE, PWD, NHAI, NHIDCL, Municipal Food Corporation of India, DIPR, Bank, Post Office wa Telecommunication.
Ki kaam wa khang u leh ha Shillong, Tura wa Jowai:
Waroh ki thaw puræ u man ki kiwa khang, ki yung mane leh, lait nei em i bia deiwa yoh bor na ki DC.
Waroh ki yung krehkaam ki bru samen u man ki kiwa khang lait noh kitu kiwa leh ya ki kaam wa emkaam wa ym hoi u dam.
Ki yung krehkaam ka sorkar pyrdi kiwa ym emkaam namo ki Non-Essential ye ki wow khang wei wow kreh na yung.
I mih ki kari kamai u pynduna da ¼ kamjooh yeiwa ye ki u kit. U chah u pynemkaam ya ki kari kamai neibynta kitu kiwa lai ya ki kaam kiwa chah kiwa da daw haneiñ.
I lai hapoh ka District wa na kawi ka District cha kawi itæ na wa cha Shillong, Jowa wa Tura kamjooh cha kiwon kiwon ki Containment Area toh iwa da khnang lait noh ya kitu kiwa da kdaw haneiñ kiwa chah wow leh yei kaam yong ki.
Da ong leh wa lada ym toh wa emkaam wow lai, da kyntu ya ki paidbah wow dam u lai cha Shillong wa ki thaw khap sor ka Shillong.
Da kyntu leh wa lada ym toh iwa ym emkaam bha wow mih wow lai, bha wow chong ha yung wei lada thok yeiwa emkaam daw chah pynchitom katkam ka aiñ.
