Hadien wa ka sorkar jylla da pynyoh ko ya ka Centre thoh Exam MPSC ha Jowai, kawa man kawi na ka mat wa ka seiñ Jaiñtia Student Union (JSU) da lai luti ko ha ki snem wa chadien neidaw wa yoo yei jynjar saja ki khynroo khyllood wa jooh lai thoh Exam chadooh cha Shillong iwa da ktah bha yei por, i lut i sep wei da maad leh man-i-por yei sahkut kari, kamtæ ka seiñ JSU da pynsñiaw ko i kmen wei sñiawngooh ya u Symbood Montri Rangbah ka jylla u Sñiawbhalang Dhar, kamjooh ya u Montri Rangbah, u Conrad Sangma kiwa da chimkhia hajrong kani ka mat dawa.
U General Secretary ka JSU Central Body, u Neilkee Mukhim hawa klam cha kiwa thoh khubor ong u, ini toh iwa da angnood leh da ki khon ka ri Jaiñtia nadooh ki snem wa chadien neidaw wa maad yei eh i saja deiwa hap u lai chadooh cha Shillong.
Kamtæ lyngba i yoh ya kani ka MPSC Examination Centre, ka seiñ JSU da pynkynmoo haroh ko ya ka sorkar wa heiyatoh wa ki Centre thoh Exam waphær waphær wa da jooh pynman ha Jowai kam ka CUET ka NEET wa toh u pynneh ki neibynta i myntoi ki khon ka Ri-loom Jaiñtia hi waroh kawi, kamwa kini ki Centre leh toh kiwa ka seiñ dadep e ko dei thoh cha ka sorkar neipor cheipor.
I pteiñ pynkynmoo ka seiñ toh hajrong ka yurim wa kat nang lai ki por ka Ri-loom Jaiñtia da ku bha ko ha ki liang waphær waphær wei wot hei puræ puthi kamjooh, kamtæ neiliang ka sorkar toh u pynyoh ko yei emkaam ka Ri-loom Jaiñtia.
Ha kani ka sngi kamwa man leh ka sngi yoh Result ki khynnah wa yakhun yaka SSLC Examination, ka seiñ chim ko leh ka laad ka kabu wow e khublei ya waroh kiwa da lehbha wei yoh ya ka Result wa bha wa miat.
Discussion about this post