Ka seiñ kiwa yah wa ki tre Truck ka jylla hapoh ka lama yong ka Meghalaya Commercial Truck and Driver Association, Jaiñtia Unit. Ynne ka sngi da pynman yalang ki ha Samanlang Hall wa em ha Loombihsyntu Mihmyntdu hadien wa neiliang u DC ka East Jaiñtia Hills District da kular u wow pynbait yei eh i khoo yong ki hajrong ka kaam kit Coke wa kynthup nadooh i dor i mur kamjooh leh i yoh Trip.
Ha kani ka yalang da wan emlang kiwa yah Truck wa ki tre Truck napoh Ri-loom Khasi Jaiñtia wa kynthup ya u President ka Meghalaya Commercial Truck and Driver Association Central Body, u Mosklandar Marngar.
Hawa klam cha ki laad pathai khubor hadien wa da kut ka yalang, u Adviser ka Meghalaya Commercial Truck and Driver Association, Jaiñtia Unit, u Ardonki Talang khana u wa ka rai wa da chim ki ynne toh yow phah ya ki kot kari cha ka kynhun wa da hukum u DC khnang yow yoh bynta wei wow pynbait yei kaam kit Coke yong ki hapooh Ri-loom Jaiñtia.
Neiliang u Chem Kyndait, Chief Adviser ka Meghalaya Commercial Truck and Driver Association won khana u wa dadep phah dei thoh haroh cha ki Company Cement yow pyrkhatlang haroh ki neibynta ka kaam kit Cement wa u Clinker kamjooh, neibhah wa boon ki tre Truck wa kiwa yah Truck wa chah ktah bha ki nadooh wa khang ya u mooyong ha ka jylla.
Hajrong kani ka chithi wa yatoh neibynta i kit i bah Cement wa Clinker, khana ki wa da yoh jubab pathan ki na u Thomas Nongtdu uwa da jubab wym ye u e Trip ya ki ha ki karkhana pynmih khyndaw-bilat.
Kamtæ hajrong ini da chim rai ki ynne ka sngi wow thoh biang ka chithi wei wow li e cha u DC kamjooh cha ki Company Cement wei la jia wym pdiang ki yeini i dawa ym yohsa wow pynman yakhih ki.
Discussion about this post