U DC ka West Jaiñtia Hills da pynmih hukum u ynne ka 18 tarik kam chibynta wow kdoh u khoom nei poor u khñiang khlam COVID-19 hapoh ka District wa ka jylla hi waroh kawi deiwa pynkrehkaam ya ka Section 144 Cr.PC deilang wa ka Regulation 3 ka Meghalaya Epidemic Diseases, COVID-19 Regulations 2020 wa da pteiñ biang ya ki Containment Measures waka Night Curfew man-ka-sngi nadooh 8:00 waje i miet hadooh 5:00 waje i step hadooh wa pynbna da kamwi.
Ki kaam wym pu chah u leh:
Ki yalang hawa em i yap bru u chah wow em du 20 ngut ki bru deiwa yohbor na u DC lane na u SDO (Civil) Amlarem katkam i emkaam.
Ki kaam wa yatoh wa i bia kiwa pynman cha baar ki thaw mane u chah deiwa em 20 ngut donhi ki bru deiwa yoh bor chwa na u DC lane na u SDO ka Amlarem. Tangwa ym chah wow pynman ya i khawai bia.
Ki yaw wa pynman chisien chi tayaw u man ki kiwa khang.
I lai i wan cha kiwi ki jylla u man i iwa khang lait noh ya ki kari wa lai luti cha Assam/Tripura/Manipur/Mizoram. Kini ki kari ym chah wow sangeh ki ha ki thaw wa man chnong ha tymbud u NH-06 uwa haap hapoh ka West Jaiñtia Hills District.
Ki kaam wa chah:
50% ki dukan u chah u wai ki ha Iawmusiang, CNI Market, Yaw Chyiap (JPC Market), Yaw Seiñriaj wa ha Iawthymme, Ladthadlaboh, Jowai deiwa pynbait ki Market Committee nadooh 9:00 waje i step hadooh 6:00 waje i janmiet. Ha ka sngi Monday toh u wai du ki dukan Odd Number, ha ka Tuesday u wai ki Even Number, ha ka Wednesday ki Odd Number, Thursday ki Even Number, Friday ki Odd Number wa Saturday ki Even Number.
Ym chah wow chongdai ha ki luti lai kjat, toh u booh ya ki Volunteer wa ki wakreh wow pait wa deiñ Mask waroh wei da leh yei yajngai uwi ya uwi. Hap leh wow booh ya ki thaw sait-kti wa ka um wa kai ha ki thaw wa pynman yaw. Lada em ki wym bood kyndon daw chah khang ki dukan hadooh ka yaw leh khlem da pyntip chwa.
Da chah leh wow wai 50% ki dukan ha ki thaw chongdai wa chipor wa em ha Yaw Seiñraij, Iawmusiang, Yaw Chyiap (JPC Market) Chutwakhu wa ha MTC Parking Lot, Iawmusiang katkam wa pynbait da ki Market Committee/Town Vending Committee nadooh ka 9:00 waje i step hadooh 6:00 waje i janmiet. Ki dukan u wai ki ha ka Monday kiwa em ya ki Odd Number, ha Tuesday kiwa em ya ki Even Number, Wednesday ki Odd Number, Thursday ki Even Number, Friday ki Odd Number wa Saturday ki Even Number.
Kini kiwa chongdai ha kini ki thaw wa da pynkhreh chipor, ka Market Committee/Town Vending Committee toh u pyntikna ki wa da bood ya ki kyndon yada na ka khlam wei ym toh wow chah u chongdai cha ki thaw wa em ha rood sarok lane ha ki luti lai kjat. Kiwa chongdai kiwa da chah jied, toh u kynjoh ktien ki cha ka Market Committee yow yoh ki yei thaw chongdai. U District Urban Planner-Cum-Secretary, Town Vending Committee daw phah ki yei pyrtuid kiwa chongdai cha ki Market Committee/Chief Executive Officer, Jowai Municipal Board.
I wai ki dukan (Essential & Non-Essential) toh iwa da chah nadooh ka Monday hadooh Saturday 9:00 waje i step hadooh 6:00 waje i janmiet.
Ka yaw Lay By Market wa em ha Ialong u wai ko da ki Odd/Even Number nadooh ka Monday hadooh Saturday nadooh 9:00 waje i step hadooh 6:00 waje i janmiet. Ki kari wa kit jhoor Wholesale ym pu chah wow psiah ki cha chnong Jowai.
Ki kaam chna yung, chna sarok wa kiwi kiwi toh deiwa bood thij ya ki kyndon.
Ki Bank, ki Post Office ye ki u krehkaam ki deiwa em ki wakreh 100% man-ka-sngi wei toh u khang chwa ka 5:00 waje i janmiet.
Ki E-Commerce wa ki Courier Service toh kiwa chah u leh deiwa bood ya ki kyndon.
Ki yung krehkaam ka sorkar jylla wa sorkar pyrdi ye ki u krehkaam deiwa em ki wakreh 100% deiwa khang 5:00 waje i janmiet.
Da chah wow mih ki kari kamai yong ki bru samen 50% hapoh ka District deiwa kit bru katkam wa chah nadooh 9:00 waje i step hadooh 6:00 waje i janmiet deiwa bood ya kini ki ha wah:
- Ha ka sngi Monday u chah du ya ki kari wa kut da u Number 1,3,5,7 wa 9.
- Ha ka sngi Tuesday u chah du ya ki kari wa kut da u Number 0,2,4,6 wa 8.
- Ha ka sngi Wednesday u chah du ya ki kari wa kut da u Number 1,3,5,7 wa 9.
- Ha ka sngi Thursday u chah du ya ki kari wa kut da u Number 0,2,4,6 wa 8.
- Ha ka sngi Friday u chah du ya ki kari wa kut da u Number 1,3,5,7 wa 9
- Ha ka sngi Saturday u chah du ya ki kari wa kut ya u Number 0,2,4,6 wa 8.
Da chah leh 50% ki kari kamai wow lai ki na West Jaiñtia Hills cha East Khasi Hills deiwa bood ya kini kini ki kyndon.
- Ha ka sngi Monday, Wednesday wa Friday u lai ki kari wa kut da u Number 0,2,4,6 wa u 8.
- Ha ka sngi Tuesday, Thursday wa Saturday u lai ki kari wa kut da u Number 1,3,5,7 wa u 9.
Kini ki kari hap ki wow kit bru katkam ka hukum wa pynmih da u Commissioner of Transport.
Waroh ki kari kamai wa lai na West Jaiñtia Hills da phah ya ki wow sangeh ki ha Boucher Road, Shillong. Kiwa yah kari toh u pyntikna ki wa kiwa chong kari toh u deiñ ki ya ki Mask wei u ye ki u yajngai para ki.
Ki kari ki bru samen da chah wow mih ki 100%.
I khayi pateiñ khappood ha Tamabil Dawki toh iwa da chah u pteiñ katkam ki kyndon wa da booh da u SDO (Civil) Amlarem wa kiwi ki kyndon kiwa da em chwa wa booh da ka Health & Family Welfare wa ka Ministry of Home Affairs ka sorkar India yow yada nei poor u COVID-19.
Ki yalang Dorbar Chnong, ki e sikai (Training), ki yong ki bru sorkar wa ki yong ki bru samen da chah deiwa yoh bor chwa na u DC lane na u SDO (C) Amlarem katkam wa emkaam.
Ki yungmane Blai u chah u wai ki katkam ki kyndon wa da pynmih da ka sorkar deiwa em ki bru 50%. I pynkyntang bia ha ki yungmane toh u man ki katkam ki kyndon wa da dep pynmih.
Ki Gymnasium/Yoga Institute/ Fitness Centres da chah u wai ki deiwa yoh bor chwa na u DC ka District lane da u SDO ka Amlarem Sub-Division.
I wan ki bru wakreh (Skilled Manpower) ya ki kaam chna yung wa kiwi kam kini ki jait toh deiwa yoh bor chwa na u DC ka District lane na u SDO ka Amlarem Sub-Divison katkam wa emkaam.
Ki Skill Training Programme ki yong sorkar wa ki yong ki bru samen ye ki wow pteiñ deiwa yoh bor na u DC lane u SDO (C) Amlarem.
Ki Park u chah u wai ki du ya kitu kiwa da dep yoh tika donhi deiwa yoh bor chwa na u DC lane u SDO (C) Amlarem.
Ki yalehke (Sports), kiwa da chah toh ki Archery, Shooting, Cycling, Athletics, Running, Golf, Lawn Tennis, Badminton, Table Tennis, Snooker, Weightlifting, Billiards, Football, Hockey, Volleyball, Basketball, Handball, Cricket wei lada em kiwon ki yakob wa pynman ym chah wow wan paitke ki paidbah wei kini waroh toh du ya kitu kiwa da dep yoh tika wa kiwa em 18 snem chaneiñ.
Heiyatoh wa ki thaw yimpa kiwa em wa pait yei psiah i mih ki paidbah kam ha ki Resort, Club Pools wa ki Public Pool; toh u yabhah yei por wei deiwa booh por chwa wow wan ki bru. Ha kini leh toh du ya kiwa da dep yoh tika wa kiwa da em 18 snem chaneiñ.
I wai ki skur wa ki College man ki kamni ha wah deiwa bood ya ki kyndon:
Heiyatoh wa ki skur kiwa em ha sor:
Class I hadooh V- Da ka Online donhi
Class VI hadooh VIII- Dei lai mih donhi cha skur
Class IX hadooh XII- U wai ki pura
Heiyatoh wa ki skur kiwa em cha palatsor:
Class I hadooh V- Dei lai mih donhi cha skur
Class VI hadooh VIII- U wai ki pura
Class IX hadooh XII- U wai ki pura
Ki College u wai ki pura ha ki thaw wa em cha sor wa cha palatsor.
Ki District School Education Officer/Sub-Divisional Education Office u pait ki yei bood ya ki kyndon wa da pynmih da ka chnat Puræ Puthi ka Meghalaya.
I wai biang ya ki thaw uiñke suwari ya kiwa napoh ka jylla, na baar jylla wa na baar ri toh i wow pait da ki Tourist Officer, West Jaiñtia Hills yow pyntikna wa da bood ya ki kyndon waroh.
Ki bru toh u deiñ ki ya ki Mask hawa mih ki cha lait, ym chah wow dih sikret wei wow mynthu ha ki thaw paidbah nadooh hapoh ki dukan, ki thaw kreh. Ya kiwa leh pyrchah daw pynchitom da ki sahep sorkar kiwa da booh kiwa da e bor hapoh ka Section 2 ka aiñ Epidemic Diseases Act, 1897.
