U General Secratary ka JSU, u Treiborlang L Suchen hawa e yei klam ha ka 17 tarik kawa man ka sngi pynkut ya i lehkmen dap 50 snem ka seiñ, da klam u chiboon ki kaam wa ka seiñ da leh ko wot hapyrdi wa wan chiboon tylli ki sei seiñbhalang.
Da ong u leh wa i daw wa duna wa wan ki bru cha kani ka sngi lehkmen ka seiñ da pynsñiawsih ko ya oo wei ini i daw toh wa da boon ware ki seiñbhalang.
Chooh chooh da ong u wa da boon ware ki seiñbhalang wa pynemkaam ya ka chaap (Seal) wa u khulom tæ jæd ka jaitbru yong i, heiwa du 1-2 ngut da sdang ki ya jar jiar ka seiñbhalang.
Da kyrpaaad u leh ya ki khynroo ka Jowai wa da pynlait san chyieñ ya ka JSU deiwa ong wa ka seiñ da sai ko chiboon ngut ki waheh wasian nadooh ki MP, ki MLA, ki Deputy CM, ki DC, ki DSP wa ki sahep wa har rukom. Da ong u leh wa ka JSU katni man ko kam kawi na ki thaw puræ namo kam ki thaw sikai kam ka skurbah wow sikai ya i rukom yong ki.
Kamtæ da kyrpaad u ya ki khynroo wow psiah cha ka seiñ deiwa kyntait ya kiwi ki seiñ kiwa kreh neibynta i myntoi ki 1-2 ngut donhi deiwa sdang seiñ.
