Ynne da man ko ka sngi wa khroo ya ki khon ka Kur War Mynso heiwa da yoh u wai ya ka Yung Dorbar Kur kawa em ha chnong Mynso, West Jaiñtia Hills wei yaka yalang da sdang da ki kyntien pdiang burom na u Secretary ka Kur, u Chinta War.
Ha kani ka sngi u Rev. Dr. Fr. Ioannis War da man u kam u kongsan katwa u Rev. BB Lamin da man u kam u symbood kongsan.
U Chairman ka kur, u Jimmy War da khana u ya ka parom heiyatoh wa i chna ya kani ka Yung Dorbar heiwa da ong u wa dap u dei mynsien wa kmen wa yoo u wa da roi bha ka kur.
Da khana u wa da em ka kot wa da thoh da u Rev. Dr. Fr Ioannis War chaphang ka kur. Da ong u wa ka kur da sdang lai luti ko nadooh na War Jaiñtia heiwa da sdang rep ki ha Sutnga wei da lai li rep cha Mynso heiwa da booh ya u pood ha khap ka Elaka Shangpung.
Da khana u yaka parom ka Beitymmen ka kur kawa tip kam ka Oor War heiwa heipor wa man broo ki khon ka kur ha u Sajar Nangli wei heipor wa yah u ki da haap ko na yubah ha iwi i thlu wei da rap ya ka da u Ron Syntem uwa da chongkha waka wei uwa da pynyoo ya u pood ki thaw ka kur.
Da pyntip u wa nei dai ya ki dieñ ki kseh na ki loom ka Kur da thied ya ini i thaw wa em kani ka Yung Dorbar ha u 2012 ha i dor Rs. 5 lak wei neitæ won da sdang i chna ya kani ka yung nadooh u 2017 hadooh u 2023 wei i lut waroh da kynjoh i Rs. 45 lak tam.
U Rev. BB Lamin hawa e yei klam da ong u wa kam uwa chongkha ha ka kur dap u dei mynsien wa kmen wow embynta wa ka kur ha kani ka sngi.
Da ong u leh wa sñiawngooh u ya u Blai wa da kyrkhu u yaka kur heiwa da man ka kur kawa da roi ha kylleiñ ki thaw wei da man ki khon ka kur kiwa da ksoh ya ki kyrdan waphær waphær. Da yaroh u leh ya ki waheh ka kur kiwa khooid hei sap i tap hawa dai ya ki dieñ ki kseh ka kur heiwa da ye u chna ya kani ka yung.
Neiliang u Rev. Dr. Fr Ioannis War kam u kongsan da ong u hawa puræ biang u ya ka kot ka kur emkaam u pynthymme namo u Revise biang ka deiwa thap sa ki kattu katni ki yutip wa dang tip kat dang yah i por.
Da ong u wa u Sajar Nangli im u heipor u Borgohain ha u 1516-1532 wei u Sajar man u Lyngshkor wa pait ya ki 12 Dolloi wei hadien wa u Syiem da sdang tieñ u ya u Sajar, da thmu u wow tynyap oo. U Sajar mar yatip yeini da pynlang u ya ki chipai yong oo heiwa da tih ki ya ka Nan Thadlaskein da ki khnam ki ryntieh kamjooh kiwi ki nan.
Da khana u wa i daw wa u Sajar Nangli choon u ya ki waheh ka kur toh neidaw wa ya maya ki wa u Syiem Sutnga wei kat wym bien ki u kyrchaan ya oo da thooh u ya ki kamjooh ya u Mooyurim Khæng Khæng wa jooh choh ki waheh ka kur wow pynlang paaid wei manda yoh u ya ki khon ka kur da kdoh yarlood namo da kdoh u ki da ki yirmai ki thri wow man broo ki neitæ poi won i parom ka Oor War.
Ha kani ka sngi da pynkup burom leh ya ki khon ka kur kiwa da pyndep ya ki puræ kamjooh kiwa da lehbha ha ki Exam waphær waphær.
Ya ka yalang da pynphooh da ki rwai wa ki chaad na ki khon ka kur kamjooh da pynkupburom leh ya ki khon ka kur kiwa da kynjoh 80 snem tam i rta. Ya ki kyntien khublei da yoh na u Manlang War uwa man u Secretary ka Inauguration Committee ka Kur.
Discussion about this post