Ka Payal Nag kawa na Odisha heipor wa em ko 8 snem, da chah riñ ko hei bordiñ heiwa da dooh ko ya waroh ki kti wa ki kjat ko, tangwa kattæ hei rta wa 18 snem da man ko kam ka Para Archery Champion ha ka World Archery Para Series wa pynman ha Bangkok, Thailand ha kini ki sngi wa dep.
Hadien wa ka Payal dooh noh ko ya ki kti ki kjat, da lai booh ya ka da ka bei wa u pa ko ha Orphanage neidaw wa joor i dooh kamtæ ym ye ki u pait u smaar ya ka tangwa dei mynsien rai kut wei khlem da dooh mynsien, da man ko kawa nyngkong dooh ka wym em kti ka wym em kjat wow man kam ka Champion hapoh pyrthai.
Ha kani ka yakob yasiat khnam wa da pynman ha Bangkok, da jop ko ar tylli ki Gold Medal heiwa da pynrem ko leh ya ka World No.1, ka Sheetal Devi.
Ka Payal Nag da yachem Final ko wa ka Sheetal Devi heiwa da jop ko da 139-136 ha ka Compound Women’s Final. Deiwa yasiat chilok wa ka Sheetal da yoh ki leh ya ka Gold Medal. Kiwa yalehke ka India da yoh ki 16 tylli ki Medal wa kynthup ya 5 tylli ki Silver wa 4 tylli ki Bronze Medal.
Ini man i leh i sien wa ar wa ka Payal da pynrem ko ya ka Sheetal heiwa nyngkong toh ha ka Para Nationals wa pynman ha Jaipur ha u January 2025.
I parom ka Payal toh iwa sñiawsih heiwa u pa ko toh uwa kreh kam u bru wa siang mooblok wei hawa dang em ko hei Class 3 heipor wa yalehke wa u diah ko ha ka mala wa san i yung wa dang chna ha Raipur, da toh yooh ko ha ka um wa haap u sainar bordiñ wei manda lai rah ka cha ka thaw sumaar, ym em laad de ki Doctor deiwi lait noh wow ah ya waroh ki kti wa ki kjat yow lait ko u yap.
Hadien wa jia ini, ki jan yung da ong ki wa bha wow e bih ka neibhah ym ye de ko wow lai wei wow baam. Ini wa jia da pynkhia bha ko ya ka yung ka sem kiwa da booh ka hapoh ka Orphanage wa pynlai da ki bor District.
Discussion about this post