U slap wa joor deilang wa ka la’ær dang pteiñ ki nei wan ka æryong Remal heiwa ynne ka sngi da chah ktah chiboon ki kaam ki bru nadooh i lai i wan hadooh i khih i kreh.
Nei step da kdur wei da bood won sa u slap wa ka la’ær wa joor iwa da wanrah ki yei oor khyndaw, i pat ki dieñ ha sarok, i chlai ki um ki wah, i pat ki chrot bordiñ wa kiwi de.
Kini da wanrah ki yei thut hei kreh, hei rep wa kamjooh i lai i wan.
Chooh chooh ki bor District ka West Jaiñtia Hills da pynbna ki ynne i sngi wa ki khynnah skur ye ki wow liwan noh cha yung wei da sakhi ya ki khynnah wa liwan ki chiteiñ sngi hapyrdi u slap wa ka la’ær wa joor. Hadien ini da pynmih noh ya ka hukum wow khang ki skur wa ki College mynstep hapoh ka District.
Da em leh i chlai um ha East wa ha West Jaiñtia Hills kam ha Wah Leteiñ, ka Wah Myntu wa kiwi kiwi.
I oor khyndaw da jia i leh mar pyrchah ka Stock ka PHE wa em ha Chahtngit nei oor i khyndaw na u sarok Jowai Bypass wa dang chna thymme.
Da sakhi leh wa pat ki dieñ ha kylleiñ ki thaw kam ha Tpep Pale, Mookyrdup, Pamrakmai, ha yung krehkaam ka Soil and Water Conservation Jowai heiwa kawi ka Jeep da chah ban ko, kawi ka kari kamai da chah ban ko ha u chrot bordiñ ha Jowai-Shillong Tourist Stand neitæ i pat ki deiñ ha Sohkymphor wa kiwi ki thaw.
I wan ka la’ær wa u slap wa joor da pynbor i leh ya kiwa boon ki dukan wow man kiwa khang chiteiñ sngi.
Ynne da em leh i thut ha i rukom saam bordiñ kamjooh ki Mobile Network.
Discussion about this post