Ka seiñ STIEH ynne ka sngi da pyntip ko wa ha ka 3 tarik u Naiynru 2022 uwi u bru watip pyrtuid kam u Resain Lamin uwa man leh u Secretary ka VEC ka Lum Tongseng da thombor u ya i yung ka T. Kyndoh heipor kamwa 9:00 waje i miet heiwa ka khon yong ka kawa em 16 snem i rta ka wym biang bha i bor pyrkhat dang em ko ha kamra thiah.
Ha ini i miet u Resain Lamin da lai khyndang u ya ka khian-dwar i kamra wa thiah kani ka khynnah wei da thmu u wow jrong kti ya ka, tangwa kat wym pu em u yoh thiah ko da khyrngiat wei da kbai yarap ko. Heitæ wot i por wan ki bru wow pyllait ya ka, wei u Resain da yut wot u na ini i thaw.
Hei yatoh wa ini neiliang kiwa ha yung kani ka khynnah da pyrchang ki wow lai ujor FIR ki ha Lumshnong Police Station ha ka 4 wa ka 5 tarik tangwa ki Pulit kani ka thanat ym bien ki wow chimkhia ya ka ujor deiwa phah pathan ya ki wow lai bichaar chwa ha ka chnong.
Tangwa haka 6 tarik u jooh u bnai (Naiynru) da lai biang ka yung chirup i emlang ka Deiwi Tongper kawa man ka President ka STIEH wei neiliang u OC ka Lumshnong PS da chimkhia noh u ya kani ka FIR wei ha kani ka sngi da lai thooh ki pulit ya uni u bru tangwa ym chem ki oo.
Ka STIEH da ong ko wa ha ka 13 tarik won u Resain Lamin da yoh u ya ka Anticipatory Bail deiwa thok wa ym em u ha chnong ha kani ka miet (3 Naiynru) wa jia ini i kaam, katwa waroh kiwa chong chnong da sakhi ki wa em hi u ha chnong.
Neitæ won ha ka 14 tarik da sdang u wow maham ya ka bei kani ka khynnah kawa da ujor pyrchah ya oo deiwa klam kob wei klam pyntieñ ya ka deiwa ong leh wa lada em poisa ym em u eh wot u tynyap bru.
Chooh chooh ka seiñ da ong ko wa neidaw wa joor u slap wei oor khyndaw ha u Naiynru ka bei yong kani ka khynnah ym em de yoh ko u lai boodien ya ka ujor, kamtæ ha ka 1 Naiynñiaw da lai ujor noh ko cha u sahep Onickson Nongtdu uwa toh u pait ya ini i kaam (Case) neibhah u Resain Lamin da tyngkheiñ u ya ki kyndon yong ka Anticipatory Bail, tangwa uni u sahep ym em chimkhia u wow leh yeiwa emkaam hajrong ini i bynta.
Ha ka 5 tarik u Naiynñiaw won da lai ujor noh ki cha u DSP (Crime), weiwa ha kani hi ka jooh ka sngi da phah u ki cha Lumshnong PS wow chim ya ki kyntien (Statement) hajrong i pyntieñ i maham u Resain Lamin, heiwa da emlang leh Additional SP ka East Jaiñtia Hills, wei da paan por ki leh kamwa 2,3 Sngi u pyndep ya i chim kyntien hei yatoh wa ka ujor wow phah pyndam noh leh ya ka Anticipatory Bail.
Hajrong ini waroh neiliang yong ka yung dap ko dei phylla wa wot hadooh 2 tayaaw leh uni u sahep ym em li e u ya ka Enquiry Report katkam ka yutip wa yoh ki ha ka 19 Naiynñiaw cha u Public Prosecutor wa u Additional SP, tangwa thok pathan u deiwa ong wa ka bei kani ka khynnah da dep yasuk ko hajrong ini i kaam.
Kamtæ da kylli ka seiñ iyi mut ini waroh heiwa u sahep da pynslem u wow e ya ka bui takit (Enquiry Report) neibynta u pyndam ya ka Anticipatory Bail yong uni u bru?
Ka seiñ da ong ko wa nei kheiñstiñ ki pulit kani ka khynnah wa ka manyung yong ka em ki hapyrdi i sy’ir mynsien, wei wa kani ka khynnah kynmoo bait ko yeiwa wan pyrchang thombor uni u bru.
Hei yatoh wa ini neiliang ka seiñ STIEH pynsñiaw ko yei wym chaniah ya ka chnat Pulit neidaw wa ki kynthai em i hei maa nei em kam kini pulit ki wym bien u chimkhia wot yei chah thombor ka khynnah 16 snem.
Da pynrap ko deiwa ong lada jia wa uni u bru leh u iwon iwon ya kani ka khynnah wa ka manyung myntu, yi wow bahkhlieh wot hadien wa da dep ujor cha ki bor ka aiñ .
Heijooh i por ong ko wa i leh arsap daw pynbor i ya ka seiñ wow lai cha ki bor wa hajrong heiyatoh wa ini i kaam khnang wow yoh kani ka khynnah wa ka manyung yong ka yei hok.
