Ynne ka sngi, ka lympung 1st Mowkaiaw Constituency Premier League Cricket Tournament da poi ko chawa kut ha ka Final hapyrdi ka Super King wa ka Sunrise ha Madan Mukhap Shongthymme heiwa u MDC ka thaaiñ uwa man leh u EM ka JHADC, u Winning G Sungoh da man u kam u kongsan hei emlang u Cooperative Extention Officer ka Laskein Block, u Baristar Niang kam u symbood kongsan.
Hachwa wow sdang ka yaleh da em ka yalang heiwa u President ka Mowkaiaw United, u Eleazer C Dkhar da khana u ya ka parom ka Club heiwa da ong u wa i thmu wow pynman ya kani ka lympung toh wow pynku ya kani ka yalehke Cricket ha ka thaaiñ.
U Baristar Niang hawa e yei klam da ong u wa ha kani ka juk emkaam bha wow kyruiñ cha ki yalehke neibhah wa man ko leh kam ka laad wow yoh khih yoh kreh deiwa ekhublei leh ya ka Club.
Kam u kongsan ha kani ka sngi, u Winning da ong u wa katni hapoh India ka yalehke Cricket man ko kawi na ki yalehke wa pawnaam bha wei kawa heh dooh i su wei dap u dei kmen wa da sdang pynman ya kam kani ka lympung ha ka thaaiñ.
Da ong u leh wa ha kani ka Final da yoo u du kiwa da heh i rta tangwa hanla kattæ leh kyrmen u wa kini u e mynsien ki ya ki khynnah wa ki khynroo wow chimbynta ha kam kini ki lympung.
Ka yaleh ha kani ka sngi hanla man ko kawa suki tangwa da man ko kawa yoosuk bha heiwa ka Wunrise da bat chwa ko wei da yoh ko 80 Run deiwa dooh waroh ki Wicket ha ka 19.2 Over.
Heipor wa Bat won ka Super Kings da hiar syndet u slap wei da pynsangeh noh ya ka yaleh ha ka Over wa 13.3 wei da yoh ko 35 run deiwa dooh 7 Wicket.
Hadien wa pynsangeh noh ya i yaleh neiliang ki Umpire wa kiwa pynlai ya kani ka lympung da rai ki wa ya i naam jop u bhah hapyrdi kini ki ar liang (Super King wa ka Sunrise) kiwa da yabhah ya ka song poisa wa T. 8,000.
Da saam leh ya ki khusnaam heiyatoh wa ka Fair Play Award kawa T. 1500 cha ka Indian, Man of the Series kawa T. 1000 cha u Eleazer C Dkhar, Man of the Match kawa T. 500 cha u Baniengskhem Laloo na ka Super King uwa da yoh 3 Wicket wa 17 Run, Highest Runs kawa T. 500 cha u Kitbor Lyngdoh na ka Super Kings uwa da yoh 242 Run, Highest Wicket kawa T. 500 cha u Eleazer C Dkhar na ka Super Kings uwa da yoh 18 Wicket, Most Sixes kawa T. 500 da yoh u Butki Shadap na ka Sunrise uwa da yoh 14 tylli ki Six.
