Khliehriat: Ka seiñ Meghalaya People United Front (MPUF) East Jaiñtia Hills hapoh i yahkhmat u President yong ka u Michal Chyrmang ryngkat u B. Ryngkhlem da lai yachem ko chirup wa ka dorkhat ya u District Transport Officer ka Khliehriat wa ya u Deputy Commissioner ka East Jaiñtia Hills District.
Ya kani ka yachem da leh hajrong wa roi wei laitlaan ki kari private wow kamai laitlooid hapoh East Jaiñtia deiwa tynhkheiñ ya ka MV Act wei kini ki bru da sah kamwa knieh ki ya ka pliangja kiwi ki bru kiwa kamai Taxi kiwa da su ya ka dan wa ha rukom yow yoh ki u kamai.
Hei yaklam wa u DTO, neiliang ka seiñ da sñiaw phylla ko hadien wa ong u DTO wa duna kiwa kreh Enforcement ka Department wei iwa man kam u moochynthut wow khanglaad ya ki kari private wow kamai ki.
Hei yatoh wa ini ka seiñ da ong ko wa toh i kaamram yong u DTO wow thooh ki laad ki luti wow pait ya ini wei toh u sñiaw sarom ki hawa ym ye ki u khanglaad yeini.
“Em ki khep wa ki pulit sylli ki ya ki kari private toh du ya kiwa kamai Khliehriat- Ladrymbai katwa ya kiwa kamai Khliehriat- Byndihati, Khliehriat-Lumshnong, Ladrymbai- Rymbai, Ladrymbai-Wapung ter ter ymjooh pait ki” da ong u Michal Chyrmang uwa da pynkut u deiwa kyntu ya ki bor wow leh salonsar yeini.
Discussion about this post