Yaka Jaiñtia Career Coaching Centre wa em ha Moowamon, Mihmyntdu kawa da dep pynbait u wai ha ka 01-05-2021 kawa pynlai da ka Jaiñtia Educational & Social Welfare Organisation (JESWO) da pynsangeh chwa yaka neidaw wa em ki kyndon wow kdoh u khoom ha chnong Jowai kawa man ka District Headquarter yong ka West Jaiñtia Hills District.
Ka JESWO toh kawa em i angnood wow booh ya kani ka Coaching Centre namo ka thaw e sikai neibynta ki khynroo thooh khih thooh kreh, yow pynchlur wow yakhun ki yaki Exam waphær waphær kam ki DSC, SSC, MPSC, CTET, MTET, Bank Exam wa kiwi, najrong wow seiñ yei khih yong samen kam ki Company, Entrepreneurship waki Partnership Firm khnang wa ka ri u ku ko ha waroh ki liang, neibhah lada biang i khih i khan ki bru yong i kamjooh ka ri leh u ku ko.
Neiliang ka JESWO kyrpaad ko yaki paidbah wow yaichah chwa waka seiñ wei hadien wa dep i khang ka sorkar, ka seiñ daw pynbait biang ko ya ka tarik wow wai ya kani ka thaw e sikai.
Chooh chooh ka JESWO ong ko wa daw sdang noh ko yaka Coaching hei yatoh wow yakhun yaka Meghalaya Teachers Eligibility Test (MTET) hadien wa wai biang ka sorkar.
Kamtæ kyrpaad ko ya waroh ki khon khynroo khyllood wa em i angnood u yakhun Exam MTET wow wan ki cha kani ka Coaching Centre yow yoh ki yei sikai hachwa u thoh Exam.
Da pyntip leh wa kani ka Coaching Centre daw leh haroh ko ya ka Mock Test waka ka Mock Interview ya kiwa da Pass.
Kani toh katkam i pyntip na u Chairman ka Jaiñtia Career Coaching Centre Managing Committee u Bishar Samaiang.
