Hadien wa ka Jaiñtia Youth Federation (JYF) da yoh ko ya i ujor na ki paidbah ka East Jaiñtia Hills, da lai yachem ko ya u Executive Engineer ka Distribution Division MePDCL, ha Moowakhu Station ha ka 25 tarik uni u bnai.
Ya ini i lai yachem da yahkhmat da u President ka seiñ na East Jaiñtia, u J. Pala wa u General Secretary, u S. Pajuh.
Ka seiñ da khyrngiat ko wow tip wa i daw wa leh ya ka Load Shedding hapoh East Jaiñtia Hills toh wa em u Transformer 132 KW uwa toh u pynpoi bordiñ ha waroh ka District lait noh ki karkhana (Factory) da sih u nadooh u Naitung (April) 2020 wei hadooh katni ympu yoh u kylliang ya oo.
Kamwa man kattæ ya ka bordiñ wa saam cha ki paidbah toh da chim na Mustem Station (West Jaiñtia) wei hajrong ini da haap wow tynpleh bordiñ khnang wow lait u chah ktah ki kor ha Mustem Station.
Hajrong ini, ka seiñ da kyntu ko ya ki paidbah wow yaichah katwa ympu ye u kylliang ya u Transformer deiwa kyntu leh ya ki sahep wa ka chnat kamjooh ka sorkar wow kyruiñ cha i eh i khoo wa chem ki paidbah.
Da kyntu ko leh ya ki MLA ka East Jaiñtia wow ap yei eh i khoo ki paidbah ym du wow kular donhi.
