Shillong: Neidaw wa kwah kreh sorkar ware da pynbor ko ya ki le ngut ki khynroo wow leh ya ki kaam thok hadooh wa psiah ki cha tharu pulit. Kini ki khynroo kiwa da chah kem kyntup ki ya u Estanrilin Sohphoh, u Tynshainlin Wanniang wa u Marvelous Kharjahrin kiwa na ka thaiñ Mawkyrwat, South West Khasi Hills.
U Secretary ka Central Recruitment Board wa man leh u kam u Principal ka Police Training School, u Lakador Syiem da ong u wa ya ki kaam buit tooh yong kini ki khynroo da chem lyngba i rukom pyllai exam ka tnat deiwa bniah bha wei hadien wa chem yeiwa leh ki da ujor cha Mawlai Police Station.
U Lakador da ong u wa u Marvelous toh uwi na kiwa pynphet ya kini ki khynroo thooh kreh wei ha kani ka kynti da chem yei leh thok u. Da pyntip u wa u Estanrilan Sohphoh wa u Tynshainlin Wanniang da phah yarap phet ki ha u Marvelous deiwa su poisa ya oo wei da chem yeini heipor ka Personal Interview.
Da chemdien yeini i leh ki deiwa pynemkaam ya ki kor chon dur pariam kti (Finger print), neibhah hawa bichaar bniah i dur pariam kti ym yahaap i wa kiwa da chon ha u Roll Number heipor wa phet, wa thoh exam ki wa heipor ka Personal Interview.
Kini kiwa chah kem toh kiwa yaleh yei kaam Follower wa lait kamwa 2 hajar tylli ha kani ka tnat, wei da pyntip wa ya kini dang takit ya ki wei ym ye de ki u thap kreh pulit neini chakhmat.
U Lakador da ong u wa ka tnat hi yaleh ko din pa din top pa top yei rukom thungkreh nadooh wow sylli ya ki kot ki sla, i chon dur pariam kti, wow leh ya ka practical wei kamjooh wow riñ dur (Video) heipor Interview.
Heijooh i por u Lakador da kyntu u leh ya kiwi ki khynroo thooh kreh wow yait ki nei pynemkaam da kiwon kiwon ki buit hawa yaleh ki ya iwon iwon i kaam khlem da kreh chitom.
Discussion about this post