Ha kini ki sngi man i iwa ñiaar wow chem yei chah thombor ki manyung du nei yaphær ha i rukom ngait niam, tangwa ha kani ka kynti, ki 9 tylli ki manyung ka Balang Pentecost ha chnong Tongseng, Elaka Nongkhlieh, East Jaiñtia Hills District da chah thombor ki dei langær ha ki bor chnong wa ha kiwa kitkaam ka Balang Presbyterian ka chnong nadooh u snem 2008 wei da pteiñ i hadooh kini ki sngi.
Hajrong ini da yoh wow yaklam wa ki kattu katni ngut ki manbei na ki 9 tylli ki manyung kiwa em hapoh ka Balang Pentecost yong ka chnong Tongseng heiwa da khana ki wa ini i chah thombor ki toh du neidaw wa em ki ha kawi tawon ka rukom ngait niam wei da poi hadooh u pood wa da chah pyndooh ki yei hok yong ki wa da mang da ka sorkar wa kynthup nadooh ki baam rachon, ki kreh chisphah sngi wa kiwi kiwi.
Chooh chooh kini ki manbei da khana ki wa ini i jia da kynthup i neipor cheipor heiwa da hap pait donhi ki du ki khmat yeiwa chah pakhot moo ki yung ki, i pynjæd ya ki yukær yung, i chah knieh yabor ki thaw yong ki wei wot hadooh wow chah thang ki trep dieñ wa ki trep masi chirup wa ki le tylli ki masi kiwa em hapoh i trep.
Da ong ki wa kini waroh da wanrah i yei sñiawsih wa i doohnong wa khroo wei yeini iwa jia da pyntip cha u Waheh Chnong, ki bor pulit ka Saipung Police Station wei wot ha u Deputy Commissioner ka East Jaiñtia Hills District tangwa yeini waroh ym em wa ap ya ki hadooh kini ki sngi wei ini waroh da pyndooh mynsien wei ym em de u chaniah ki ya ki bor sorkar wei i chah thombor dang joor i kat dang lai i por.
Heijooh i por da khana ki wa hanlada man ki kiwa da chong chnong da slem da ki phaw phaw snem tangwa manda paan ya ka Residential Certificate da yoh pathan ki du da ka Temporary Residential Certificate.
Heiyatoh wa ki Card Rachon hadien wa ymem u yoh ki ya ki, da lai kylli ki na ka yung krehkaam u DC heiwa da chem ki ya ki Card wei neiliang kiwa kreh ka chnat Supply da ong ki wa ka chnong da pyntip ko wa kini ki bru (na ki 9 manyung) ym em de ki.
Hajrong i kaam mane wow pynman yaseiñ leh da chah khang ki, da chah pynsangeh i chna ya i yungmane wa da thmu wow chna ha i thaw wa da e da ka para wangait wei manda mut ko u chna yung noh ha ini i thaw da chah khang wei da knieh ya i thaw dei thmu wow pynemkaam noh da ka chnong kam ka Aganwadi Centre.
Ya ini waroh i chah thombor kini ki manbei da pynsabut da ki chithi wa da yoh na u Waheh Chnong, na u Secretary ka Balang Presbyterian, wa ki dur wa Video, wot ka chithi wa da ujor cha u DC ka District.
Ym du kat heitæ tangwa wot ki kari kamai hapoh ka chnong leh da khang wa ymtoh u kit ya ki dkhot yong kini ki manyung kamtæ da hap lai kjat ki wow poi cha ki thaw wa yoh ki da ki kari na kiwi tawon ki chnong.
Da pyntip wa heipor wa thmu wow chna ya ka yungmane da chah khang biang ki ha u bnai wa dadep wei ha ka 2 tarik uni u bnai leh da chah khang wei chah tympiah tympra i.
Kini ki manbei da khana ki wa da jooh thoh teiñ ki cha ki bor chnong wow chna yungmane wa i thaw loom-tlep tangwa ym yoh jubab ki hadooh kini ki sngi wei manda sdang u chna yungmane pyn ha i thaw yong ki leh da wan da ki phaw ngut wow pyrchah deiwa pynbaad wa ym em yohbor (NOC) ki na ka chnong, ‘ileh yei ngait niam hapoh ka ri emkaam NOC mo?’ da kylli kawi na ki manbei.
Da pyntip ki wa ha ka 1 Naisan 2021 da em i khlaad noh uwi u khynnah (7 snem) uwa man u khon yong kawi na ki manbei ka Balang Pentecost, tangwa ka chnong ym chah ko wow lai tlep deiwa ong wa daw yang ya i rai hadien ar sngi, neiliang yong ki dei wym yohsa wow lai ood cha ki bor wa hajrong khamtam heipor Lockdown kamtæ da pyndep bait ya ka niam ka rukom wow tlep pyn ha i kpær yong ki ha ka 2 tarik. Da pyntip ki wa kani ka Balang Pentecost da em ko hapoh ka chnong la kamwa 40 snem wei neiyi i daw wym pyrchah nadooh itu i por.
Hajrong ini waroh, neiliang ki manbei hapoh ka Balang Pentecost da kyntu noh ki ya ki bor ka aiñ wow kyruiñ leh cha ki da i mynsien wyrai para bru khnang wow yoh ki ya i hok yong ki kamwa man ha kiwi ki thaw ka ri wa ka jylla.
