Shillong: Ka Meghalaya SSA School Association (MSSASA) ha ka khubor wa phah da u H.M. Marbaniang General Secretary, da kyrpad ya waroh ki School Managing Committee nadooh ki skur mission, ki skur private wa kiwi kiwi kiwa yoh yarap na ka SSA wa ki skur wa da seiñ lyngba ka SSA wow krehlang ki wa ka synjuk ha i yakhih deiwa sangeh krehkaam khlem booh por næ ka Indefinite Strike nadooh ka 18 tarik uni u bnai.
Kiwa sikai SSA da em ki kamwa 12481 ngut deilang wa ki 4th Teachers kiwa em 1521 ngut kiwa hikai ha ki 5000 tam ki skur kiwa yoh yarap lyngba ka Sarva Shiksha Abhiyan (SSA) hapoh ka jylla.
Ya kani ka rai da chim da ki hajar hajar ngut kiwa sikai SSA wa 4th teachers ha ka lai paidbah (Mass Rally) kawa pynman ha ka 12 tarik uni u bnai ha nongbah Shillong hajrong wym bna ka sorkar u pynkrehkaam yei dawa kiwa sikai kiwa kynthup wow pyllait ya ka tulop thymme wa ki tulop wa sah (Arrears) kawa toh u yoh ki nadooh u Naitung (April) 2016.
U pynbait ya ka result kiwa lai puræ Diploma in Elementary Education (D.El.Ed) yong ki batch 2013 wa 2014 kawa pynmih da ka NIOS kawa boon du i bakla iwa da ktah ya ka tulop kiwa sikai.
U phah training ya kiwa dang sah kiwa sikai ki wym pu em pyndep ya ka Professional Qualification (D.El.Ed) katkam ki kyndon yong ka NCTE.
I wym mano ka sorkar man i yoohbeiñ ya i hok yong kiwa sikai SSA wa ki 4th Teachers kiwa da chakri kattu da palat 10 snem yow e ya i nang i stat cha ki khynnah ka jylla wei ka sorkar u kitkhlieh ko ya ki phaw hajar ngut ki khynnah skur ki wow chah ktah neini i sangeh krehkaam kiwa sikai.
Also Read: Hadien i lai paidbah maham kiwa sikai u khang noh ya ki skur nadooh ka 18 tarik uni u bnai
Discussion about this post