Neidaw wym su yaka Bill ka PWD sahkut khlem pynemkaam yaka BITE ha Byndihati

Hadien wa dep lai pait ka KSU-EJHDU lyngba ka Education Cell ka District haka 19 tarik uni u bnai ya ka yung (Building) ka Block Institute of Teachers Education (BITE) waka Residential School kiwa em ha ka chnong Byndihati, ha ka 21 tarik won, ka seiñ da lai paan pynche ko na ka Director yong ka DERT, ka R.S. Manner hajrong kani ka yung ka BITE kawa em ha Byndihati kawa da ieh tyngkreng khlem da pynkrehkaam wei ka seiñ da yoh yutip ko wa ya kani ka yung krehkaam toh yow e sikai pynliah ya kiwa sikai skur, kawa da sdang nadooh u snem 2012 wei da dep u chna ha u snem 2015 wei kamwa chem ka seiñ wa ya kani ka yung da ieh khlem pynemkaam hadooh katni neidaw wa ka chnat PWD (Building) ym pu e kti ko ya kani cha ka Directorate of Educational Research & Training (DERT) yow pynemkaam pura.

Kamwa da tip ka seiñ, i daw wa sahkut wow e kti ya kani ka yung krehkaam toh neidaw wym pu pynlait ya ka Bill kawa Rs. 3 klur tam hadooh katni na ka sorkar wei iwa da pynphylla ya ka seiñ toh wa kani ka yung Building toh kawa da dap 8 snem katu wei ka sorkar da leh mutlop ko wow pynlait noh ya ka Bill hadooh wa da sepai khlem yoh u pynemkaam ya iwa da dep chna.

Iwa pynsñiawphylla ya ka seiñ toh wa cha kiwi ki District wa yoh ki ya kini ki yung krehkaam ka DIET wa pura, da yoh yarap ki ki Rs. 15 klur du wow pynchna yeiwa da sih tangwa ha East Jaiñtia Hills da chah leh chilliang wei da chah ieh khonswet hanla ka Building kawa da em 8 snem pura ym yoh u pynemkaam iwa pynyoo wa ka sorkar ym bna ko yei bha i miat ka District.

Neiliang ka Director da batai ko leh wa katai ka Building toh neibynta ka Block Institute of Teachers Education wei manda yoh ya ka Sanction wa pura daw pynkylla cha ka District Institute of Teachers Education (DIET) yong ka District.

Related posts

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Ym du ha Garo tangwa ka Meghalaya waroh da yoo yei kylla hapoh ka NPP, ong ka MLA wa thymme ka Gambegre

November 23, 2024

Ka seiñ da lai pait ko leh ya ka yung ka Residential School kawa em ha katai hi ka chnong wei da chem wa kani ka yung Building leh man ko kawa da chah ieh chrah wei da man kawa pynsepai poisa paidbah.

Neiliang ka seiñ da pyrchang ko leh wow yachem wa u khlieh wa toh u pait yeini i skur tangwa ym yoh laad wei daw lai paan pynche leh chaphang kani ka skur yow pynsmat yei kreh yow yoh myntoi ki khynnah ka thaaiñ.

Da pyntip leh wa neiliang ka Director da kular ko wow lai pait yei long i man kani ka Building ha kini ki sngi wow wan wei da kular ko leh wow phah ya ka PWD wow e kti smat ya kani ka Building cha ka DERT khnang yow pynkrehkaam noh ka.