Ka Arunachal Pradesh da pynkut ko yei lait luti ka Meghalaya ha ka yalehbol Group 2 ka U-17 ki kynthai ha ka 2nd North East Olympic Games 2022 ynne deiwa jop da 3-1 ha madan Polo.
Ka Arunachal da thap kool nyngkong ko ha ka minit wa ar lyngba ka Kai Rumi. Ka Meghalaya won ym em yoh ko wow thap ya ka Penalty heiwa hadien ini da thap biang ka Arunachal ya ka kool wa ar lyngba ka Angel Tawang ha ka minit wa 22.
Ka Gunai Taisik da thap ko ya ka kool wa le ka Arunachal ha ka minit wa 54 wei chwa u kut ka yalehke, ka Meghalaya lyngba ka Makrisha Songthiang da yoh ko wow pynuiñ chi kool.
Ka Meghalaya da emkaam ko wow jop hadien wa rem ko ha ka Mizoram da 4-2. Ka Arunachal da dep jop ko leh ya ka Mizoram da 3-1 wei deiwa jop biang ynne da yoh nyngkong ko ha ka Group 2 deiwa em ka Mizoram hei wa ar kawa da yoh u psiah Semifinal lang.
Hapyrdi won ka Sikkim wa Assam da hap pynman dei yachut Tie-Breaker hadien wa kut ka yalehke da mar chi kool heiwa da jop won da ka Sikkim hadien wa yachut 3-0.
Da hap wow pynman da ka yachut Tie-Breaker neidaw wa waroh arliang da yoh ki i jooh ki Point deilang ka Goal Difference wei da dep rem ki leh waroh ar ha ka Manipur mar da 6-0 ha ka tayaw wa dep. Ka Manipur deiwa jop la arsien da yoh chwa ko u psiah Semifinal na ka Group 1.
Ka Semifinal ki kynthai daw pynman ha ka 14 tarik hapyrdi ka Manipur wa Mizoram heipor 11:00 waje i step wei daw pynbood da ka Arunachal waka Sikkim heipor 4:30 i sngi.
Mynstep ha ka yong ki U-21 ki chynrang, daw pynman ya ka Semifinal hapyrdi ka Mizoram wa Nagaland heipor 11:00 waje i step iwa daw pynbood da ka Meghalaya wa Manipur heipor 4:30 i janmiet.
Ya kiwa wan paitke ym hap ki wow su poisa tangwa duna donhi ki thaw paitke wei daw e laad ya kiwa poi nyngkong chwa.
