Kiwa yaleh Golf ka Assam da pynyoo ki yei sap yong ki ha Shillong Golf Course deiwa jop san tylli ki takma ksiar ha ka 2nd North East Olympic Games 2022.
Ka Golf toh kawa da sdang ha ka 10 tarik uni u bnai wei da pynkut ya ka ynne ka sngi. Ka yalehke toh deiwa pyndep u thap 18 tylli ki thlu.
Najrong kini ki 5 tylli ki takma ksiar, ka Assam da jop ko leh ar tylli ki takma rupa wa ar tylli ki takma tama. Ka Meghalaya da yoh ko kawi ka takma ksiar, 6 tylli ki takma rupa wa soo tylli ki takma tama.
Ka Manipur da yoh ko kawi ka takma ksiar, ar tylli ki takma tama, katwa ka Arunachal Pradesh da yoh ko kawi ka takma ksiar.
Ka Assam da yoh takma ksiar (Team Gold Medal) deiwa lehbha ka Snigdha Goswami, u Jakir Hussain, Biki Datta wa u Kalyan Sahul heiwa ha ini, ka Meghalaya da yoh takma rupa ko katwa ka Manipur da yoh takma tama ko.
Hei yong samen won (Over All Champion), da yoh takma ksiar ka Goswami na Assam, takma rupa da u Hussan na Assam wei takma rupa da uwa yong ka Meghalaya, u Dr. KI Singh.
Hei yong samen biang, ka Amateur Division, da yoh takma ksiar da uwa yalehke wa dang khian rta dooh ka Meghalaya, u Jason Passah, uwa da sdang u yalehke Golf du ha kini ki ar snem hadien wa liwan yung u wa em ka khlam COVID-19. Yei takma rupa da yoh u Biki Datta ka Assam wei i takma rupa da yoh u Jonathan Iawphniaw ka Meghalaya.
Ka Goswami da yoh takma ksiar ko leh hei yong ki kynthai, heiwa ka Meghalaya da yoh takma rupa da ka Jyoti Agarwal wa i takma tama da ka Pooja Goenka.
U Keisham Indrajit Singh ka Manipur da jop u ya ka Super Senior deiwa yoh wa ar u Hector Marwein ka Meghalaya hei wa le won u Nagesh Singh ka Assam.
Ka takma ksiar ka Arunachal da yoh da u Col Hemonto Panging, uwa da jop ya ka Senior Category heiwa da yoh wa ar u Benu Malakar ka Meghalaya wei hei wa le u Lhunkhotang Hangsing ka Manipur.
U Hussain da yoh u ya ka takma ksiar ya ka Assam ha ka Mid-Amateur Category, heiwa ka Meghalaya da yoh takma rupa ko lyngba u Dr. Singh wa ka takma tama da u Gaurav Bajaj.
Ha ka Professional Category won da yoh u Deben Bhumij ka Assam, u Anil Ram ka Meghalaya hei wa ar wa u Deepraj Chetia ka Assam hei wa le.
