Deiwa yoh du kawi ka takma ksiar ha u 2018, ka Meghalaya da yoh ko 3 tylli ha kani ka kynti ka 2nd North East Olympic Games hei yaleh Table Tennis wa da pynkut ynne ha NEHU Indoor Hall.
Ka Meghalaya da jop ko ya ka Mixed Doubles Final pyrchah ya ka Mizoram, ka Women’s Doubles pyrchah ka Mizoram waka Women’s Singles pyrchah ya ka Tripura. Ka Tanushree Dasgupta da jop biang ko yei naam ka Women’s Singles kawa da jop ko ha u 2018 wei da embynta lang ko ha ka yalehke wa mar arngut.
Ka Mizoram da jop ko ya ka takma ksiar ha ka Men’s Singles wa Men’s Doubles.
Ki Women’s wa Men’s Doubles Finals toh kiwa da pyndep ynnin i miet. Ka Dasgupta waka Camelia Diengdoh ka Meghalaya da jop ki ya ka Lalthansangi waka Malsawmtluangi ka Mizoram da 11-13, 11-6, 11-8, 11-8 katwa u Alberto wa u John yong ka Mizoram da jop ki ya ka Manipur wa mihkhmat da u L Bikram Singh wa u Y Boy Singh da 11-9, 11-5, 11-7.
Ynne, ka Dasgupta wa u Suranjit Dey da jop ki ya u Alberto waka Lalthangsangi ka Mizoram da 11-5, 12-10, 5-11, 11-7 yow yoh takma ksiar ha ka Mixed Doubles katwa ka Dasgupta da jop ko ya ka Sreyashi Chakraborty ka Tripura da 11-5, 11-2, 11-7, 11-13, 11-9.
Ha ka Men’s Singles, ka Mizoram da poi Final da arngut wa jop da u Alberto ya u Lalruatsanga da 9-11, 11-8, 11-1, 11-4, 12-10.
