Kiwa yalehke ka Meghalaya ha ka Track & Field da pynku ki yei yoh takma ksiar ka jylla da 5 tylli deiwa jop ha ki yakob wa boon jait wa da pynman ha SAI Training Centre ha NEHU Campus ynne.
Ka Meghalaya da yoh takma ksiar ko iwa boon dooh hawa nujor wa kiwi ki jylla wei da yoh ko leh iwi i takma rupa wa ar tylli ki takma tama.
Ka Assam da yoh ko 3 tylli ki takma ksiar, iwi i takma rupa, katwa ka Manipur da yoh ko 2 tylli ki takma ksiar, 3 tylli ki takma rupa wa ar tylli ki takma tama. Ka Tripura won da yoh ko 2 tylli ki takma rupa wa iwi i takam tama, ka Sikkim 2 tylli ki takma rupa, ka Mizoram iwi i takma rupa, ka Nagaland 3 tylli ki takma tamwa wa ka Arunachal iwi i takma tama.
Ka Melibad Kro da yoh takma ksiar ko ya ka Meghalaya ha ka U-20 Women’s Javelin, u Marso Kyndait, uwa man du oo wa yoh takma ksiar ya ka Meghalaya ha ki Athletic ha ka 1st NEOG ha u 2018, da yoh takma ksiar biang u ha ka Above-20 Men’s 1500m.
U Skhemlang Suba, uwa da rah leh ya ka lama ka jylla ha ka sngi wai pyrda, da yoh takma ksiar u ha ka U-20 Men’s 800m. Ha ka Above-20 Women’s 400m, ka Gloryfy Kurbah da yoh takma ksiar ko katwa u Daniel Wahlang da yoh takma ksiar u ha ka Above-20 Men’s 10000m.
Kiwi de kiwa yoh takma ksiar ynne ka sngi toh u M Al Ken Singh na Manipur (Above-20 Men’s 400m), ka N Chaoba Devi na Manipur (Above-20 women’s 1500m), u Arupjyoti Gogoi na Assam (U-20 Boys’ 100m), ka Laimwn Narzary na Assam (Above-20 Women’s High jump) wa u Manoj Swarginari (Above-20 Men’s Javelin).
