Ynne ha ka sngi hawa wai ya ka yung krehkaam ka Seiñ Kynthai ka Dorbar Chnong Khliehtyrshi, u Montri ka sorkar jylla, u Sniawbhalang Dhar uwa man leh kam u MLA ka thaaiñ, da ong u wa boon kiwa beiñ ya ka yung yong oo tangwa lada ym em kam ki waroh ka spah neini daw rah lut ki dkhar cha baar wei em hadooh 8,000 tam kiwa da yoh kreh na ka Company yong ki.
Da pynkynmoo u leh wa da jooh ong u ya u Wailadmiki wa emkaam u wow pyndep ya ki kaam wa da sahteiñ na kiwi ki MLA warim.
Heiyatoh wa iwa jia ha Mukroh, da ong u wa dang step da man dorbar wei da rai wow lai u Montri Rangbah wa u Symbood Montri Rangbah cha ini i thaw heiwa da pdiang ya ki da ki slipar wei ini pynyoo wa kini ki khynroo chah yah luti bakla ki ha kiwi tawon.
Da ong u leh wa la 50 tylli ki snem wa da yoh jylla tangwa manda poi ha kani ka kynti da pynbait noh ya u pood yow suk ki paidbah yong i kiwa em ha khappood.
Da yaroh u leh ya ka Khliehtyrshi wa man ko kawa yatylli hei wow jied ya kiwa mihkhmat neibhah ka rai hi man ko ka yong ka Khliehtyrshi wei kut sien wa wan ki heh ka chnong ym jooh liwan thylli ki na ka miej yong oo.
“Nga ym rem O wei daw tam kput O ha u snem wa daw wan na ka Nartiang Constituency,” da ong u Sniawbhalang deiwa pynrap leh wa lada em i kaam iwa ymye u Wailadmiki u leh oo wow pyndep yeitæ.
