Ngait sakhiat uwi wa da man IPS Officer u hadien wa su Rs. 2 lak cha uwa pynchna Uniform ya oo

I jia wa phylla bha da mih i na Bihar heiwa da em u khynroo uwa 18 snem i rta da chah kem u hadien wa riam u kam u pulit wa man kam u IPS ha ka 20 tarik uni u bnai ha Jamui District.

Iwa rap phylla chooh chooh wa uni u khynroo wa tip kam u Mithilesh Manjhi da ngait u wa oo toh u IPS Officer hadien wa su u Rs. 2 lak yow thied ya kani ka Uniform pulit wa em le khloor na uwi u bru wa tip kam u Manoj Singh uwa na chnong Khaira.

Hadien wa yoh u ya kani ka Uniform da sdang u wow lai cha wah chaneiñ deiwa riam kam u pulit wei da rah u leh ya kawi ka Pistol yong kyndeh deiwa yah ya kawi ka thuk thuk.

Manda poi u ha Sikandra Chowk da hiar u heiwa ki paidbah da sdang ki wow yalang oo deiwa yoo phylla ya uni u bru wa dang khian rta wa em le khloor heiwa da em kiwa pyntip cha ki pulit ka Sikandra Police Station kiwa da wan wow rah ya u Mithilesh.

Related posts

Pyrchah ka India yei thmu ka IMF wow e yarap poisa ya ka Pakistan da ki Billion Dollars

May 9, 2025

Sangeh yakhih ka MCTODA | Da e por ya ki karkhana Coke 10 sngi

May 9, 2025

U Mithilesh da chim ram u Rs. 2 lak na u ma u uwa da e yeini yow yarap yoh kreh pulit u.

U Manoj Singh uwa thok chukor ya oo, da thaw u yei jrong i kmai u wei da e u leh ya oo ya kani ka Uniform kawa em nadooh ka Badge deilang ka Pistol yong kyndeh wei da kmen bha u Mithilesh wa da yoh sakhiat u wow man kam u IPS Officer.

U Mithilesh da khana u wa u Manoj da ong u wa lada e u Rs. 2 lak u pynyoh kreh pulit u oo, wei da e kti u ya kawa boon ka poisa chi bnai chwa wei kawa sah kawa Rs. 30,000 da e u heipor wa lai chim u ya ka Uniform.

U Mithilesh hawa yaklam wa ki pulit da ong bait u wa oo toh u IPS Officer wei heipor wa wanrah ya oo chapoh Police Station da leh u kam u pulit hadooh wa ki pulit da ong ki ya oo, “Come in Sir, IPS.”

Neiliang ki pulit da pynman ki ya ka takit yow chem ya kini ki bru wa thok chukor ya ki bru deiwa kular kreh.